Хууль зүй, дотоод хэргийн яам хилийн шалган нэвтрүүлэх албаны бие бүрэлдэхүүний мэдлэг, ур чадвар, алба хаах нөхцөлийг сайжруулан, үйл ажиллагааг олон улсын жишигт хүргэж стандартыг шинэчлэх бодлого баримталж байна.
Хууль зүй, дотоод хэргийн сайд С.Амарсайхан Хил хамгаалах Ерөнхий газарт ажиллах үеэрээ энэ тухайгаа тодотгож, “Иргэн төвтэй эрх зүйн реформ”-ыг хэрэгжүүлж, хил хамгаалах эрх зүйн орчныг сайжруулан, хилийн цэргийн байгуулалтыг бэхжүүлж, “Бүсийн хилийн албыг удирдах газар”-ыг байгуулахаа онцоллоо.
Монгол Улс, ОХУ-ын хилийг 2 дахь удаагаа, Монгол Улс, БНХАУ-ын хилийг 3 дахь удаагаа хамтран шалгаж байгааг Хил Хамгаалах Ерөнхий газраас мэдээлэв.
ХЗДХ-ийн сайд С.Амарсайхан улсын хилийг хамтран шалгах түүхэн, хариуцлагатай ажлыг бүх талаар дэмжиж, анхаарахаа илэрхийлэн, хил хамгаалах салбарт хиймэл оюун, их өгөгдөлд суурилсан орчин үеийн дэвшилтэт техник, технологи, программ хангамжийг нэвтрүүлж, хилийн боомтын аюулгүй байдлыг ханган, цахим гарцыг нэмэхэд анхаарч байгааг хилчдэд танилцууллаа.
Мөн салбарын албан хаагчдын цалин хангамжийг үе шаттай нэмэх, “Хилийн тэнгэр” 1054 айлын орон сууцны хотхон, хилийн заставын “Шинэ эрин-ногоон хөгжил” 1208 айлын орон сууцны төслийг эрчимжүүлж, 850 хилчнийг ипотекийн зээлд хамруулан, төсвийн зохицуулалт хийж, хөрөнгө оруулалтыг жил бүрийн улсын төсөвт тусгуулахад анхаарна гэжээ.
Уулзалтын үеэр ХЗДХ-ийн сайд С.Амарсайхан цэргийн алба хаагчдын дүрмийн бус харилцаа, хүний эрхийн зөрчлийг таслан зогсоож, алба хаагчдын амь нас, эрүүл мэндтэй холбоотой эрсдэл, осол, зөрчил гаргахгүй байхад анхаарахыг хил хамгаалах байгууллагын бие бүрэлдэхүүнд үүрэг болгоод, албан тушаалаа урвуулан ашиглах, хууль зөрчих, эрх мэдлээ хэтрүүлбэл хатуу хариуцлага тооцохоо анхааруулсан байна.
Уулзалтын үеэр эх орныхоо хилийг манах хүндтэй үйлсэд зүрх сэтгэл, ур чадвараа дайчлан, хамт олноо манлайлсан албан хаагчид Ерөнхийлөгчийн зарлигаар төрийн дээд, одон медалиар шагнуулсныг гардуулан өгчээ.
Эх сурвалж: Montsame.mn
