Цэргийн цол чимэг олгох 35 дахь удаагийн Бүх цэргийн наадамд ирэх сарын 6-нд Монгол бөхийн өргөөнд болно.
Жил бүр уламжлал болгон зохион байгуулдаг энэхүү барилдаанд Монголын үндэсний бөхийн холбооны аймаг, цэрэг, сумын цолтнуудын 2025-2026 оны улирлын чансааг харгалзан оролцуулах ажээ. Өөрөөр хэлбэл, МҮБХ-ноос энэ улиралд зохион байгуулсан барилдааны цол цолны чансаагаар оролцох тоонд багтсан бөхчүүд оролцоно гэсэн үг. Ингэхдээ аймаг, цэргийн арслан цолтой 99, заан 25, харцага найм, начин 64, сумын цолтой болон залуу 60 бөх барилдуулахаар квот тогтоосон байна. Хүндэтгэх шалтгаанаар оролцох боломжгүй бөхийн оронд дараагийн чансаанд жагссан бөх нөхөх журамтай аж.
1992 оноос эхлэлтэй тус наадамд хамгийн анх Булган аймгийн Бугат сумын харьяат улсын чин С.Дэлгэрбат түрүүлж байва. Тэгвэл өнгөрсөн жилийн Бүх цэргийн наадамд Говьсүмбэр аймгийн харьяат аймгийн хурц арслан Э.Мөнхбаатар түрүүлж, “Бадрангуй” чимэг хүртсэн юм. Тэгвэл 2021, 2022 онд улсын заан М.Лхагвагэрэл, 2000, 2001 онд начин Д.Цогзолдорж нар дараалан түрүүлсэн бол улсын аварга Ч.Санжаадамба 2008, 2010, харцага А.Бямбажав 2005, 2007 онд түрүү бөхөөр тодорчээ.
Бүх цэргийн наадамд түрүүлсэн бөхчүүдээс аймгийн хурц бадрангуй арслан Э.Мөнхбаатар, цэргийн арслан Г.Жамбалдорж, Б.Өлзийсайхан, Д.Цэрэнням нар улсын цолонд хүрээгүй байгаа юм. Тэгвэл энэхүү наадамд түрүүлж байсан бөхчүүдээс дархан аварга нэг, улсын аварга хоёр, гарди хоёр, заан хоёр, харцага гурав, начин 16 төрсөн байна.
Эх сурвалж: Montsame.mn
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!