Хууль зүй, дотоод хэргийн сайд С.Амарсайхан БНСУ-ын Хууль зүйн сайд Жон Сон Ху-тэй уулзан, иргэд хооронд зорчиход үүсээд буй хүндрэл, бэрхшээлийг шийдэх, гэмт хэргийн тоог багасгах, эрүүл мэндийн үйлчилгээ авахаар зорчиж буй иргэдийн визний нөхцөлийг хөнгөвчлөх, хөдөлмөр болон оюутан зуучлалын үйл ажиллагааг хянаж, хариуцлагыг дээшлүүлж, шалгуурыг нарийвчлах талаар ярилцжээ.
Энэ тухайгаа тэрбээр БНСУ-д сурч, ажиллаж буй монгол иргэдийн төлөөлөлтэй уулзах үеэрээ танилцуулсныг ХЗДХЯ мэдээлэв.
Монгол Улсын ЭСЯ-наас санаачлан хууль бусаар оршин суугаа болон монгол иргэдийн холбогдсон гэмт хэргийн тоог багасгах зорилгоор “Хариуцлагатай амьдарцгаая” аяныг үргэлжлүүлэн, БНСУ-ын талтай хамтран ажиллахаар болсон байна.
Сүүлийн үед цахим сүлжээгээр хууран мэхлэх, сугалаа, залилан зэрэг гэмт хэргийн эсрэг хэрэгжүүлж буй арга хэмжээ, нотариатын үйлчилгээг энэ оны есдүгээр сараас цахимжуулснаар хилийн чанадад оршин суугаа иргэдэд төрийн үйлчилгээг ойртуулах боломжтой болох юм. Эцэг, эхийн хараа хяналт сул оюутан залуус эрсдэлд өртөх, хууль зөрчих, хохирох тохиолдол цөөнгүй гарч байгаад анхаарах, урьдчилан сэргийлэх, хууль, эрх зүйн мэдлэгийг сайжруулахад анхаарах хэрэгтэй байгааг иргэд хэлж байв.
Мөн төрийн цахим үйлчилгээний төрөл, хүртээмжийг нэмэх, суугаа орны байгууллагатай хамтран ажиллах, хилийн чанадад оршин суугаа иргэд ипотекийн зээлд хамрагдах, эх орондоо буцан суурьших нөхцөлийг дэмжих, нутагтаа эрүүл амьдрах нөхцөл бүрдүүлэх, цахим болон орон сууцны залилангийн эсрэг дорвитой арга хэмжээ авах, гэр бүл, хүүхдийн эрхийг хамгаалах чиглэлээр төрийн байгууллагын чадавх, санхүүжилтийг нэмэх, сэтгэл зүй, эрүүл мэнд, санхүүгийн дарамтад орсон иргэдийг түр байраар хангах санхүүжилтийг шийдэх зэрэг талаар санал солилцжээ.
Эх сурвалж: Montsame.mn
