Дэлхийн эрүүл мэндийн ассамблейн 32 дугаар чуулганы шийдвэрээр 1988 оноос эхлэн жил бүрийн 5 дугаар сарын 31-ний өдрийг тамхины хэрэглээ, түүний утаанаас үүдэлтэй хор хөнөөл, байгаль орчин, эдийн засагт үзүүлэх сөрөг нөлөөллөөс хойч үеэ хамгаалах зорилгоор “Дэлхийн тамхины эсрэг өдөр” болгон зарласан бөгөөд жил бүр тодорхой уриатайгаар тэмдэглэж ирсэн түүхтэй билээ.

Тус түүхт өдрийг угтан Баянгол дүүргийн Хүүхэд, гэр бүл хөгжил, хамгааллын хэлтэс, Аддиктологиийн төв, Улсын хоёрдугаар төв эмнэлэг болон “Бүх нийтийн эрүүл мэн ба тэгш байдлын мэргэн дуу хоолой” ТББ-ууд хамтран 2026 оны 5 дугаар сарын 29-ний өдөр Баянгол дүүргийн “Байгаль эх” цогцолборын өмнөх талбайд нээлттэй өдөрлөгийг амжилттай зохион байгууллаа.

Үйл ажиллагааны нээлтийн үеэр Соёлын тэргүүний ажилтан, морин хуурч Алтанхуяг аялгуу дуугаа өргөн мэндчилсэн бөгөөд нээлтийн арга хэмжээнд Аддиктологийн төвийн дарга Д.Ганбат, Баянгол дүүргийн ХГБХХХ-ийн дарга Б.Даваажаргал, Улсын хоёрдугаар төв эмнэлгийн Уушги судлалын тасгийн эмч Э.Цээпил, Хүүхдийн тасгийн эмч Э.Энхцэцэг, Нийгмийн эрүүл мэндийн мэргэжилтэн Ч.Гүнчинхорлоо нарын албаны төлөөлөгчид болон бусад эмч, сэтгэл зүйч, нарийн мэргэжлийн ажилтнууд оролцож, иргэдийг хорт зуршлаас татгалзаж, эрүүл амьдралын хэв маягийг хэвшүүлэхийг уриалсан юм.

Тус өдөрлөгөөр иргэдэд тамхины хор хөнөөлийг таниулах нөлөөллийн ажил хийсэн бөгөөд донтолт болон уушгины нарийн мэргэжлийн эмч нар газар дээр нь үзлэг, оношилгоо хийж, зөвлөгөө өгч ажиллав. Мөн сэтгэл зүйн сорил, тест бөглүүлж, тамхинаас гаргах хүсэлтэй иргэдэд тамхины хамаарлыг бууруулах нэг удаагийн наалтыг үнэ төлбөргүй нааж, мэргэжлийн сэтгэл зүйн зөвлөгөө, мэдээллийн товхимол, гарын авлагыг тарааж өглөө. Үйл ажиллагааны явцад нийт 50 гаруй иргэн идэвхтэй хамрагдаж, эрүүл мэндийн тусламж, зөвлөгөөг авсан бөгөөд хамтран зохион байгуулагч байгууллагуудын зүгээс иргэдийг хорт зуршлаас урьдчилан сэргийлэх, соён гэгээрүүлэх ажлыг цаашид ч үе шаттайгаар тогмол зохион байгуулахаа илэрхийллээ.

Эх сурвалж: Баянгол Дүүрэг ИТХАА