Нийслэлийн Засаг даргын орлогч Г.Жаргалсайхан Дэлхийн банкны Монгол дахь суурин төлөөлөгчийн газрын төлөөлөгчид, Боловсролын яам, Боловсролын ерөнхий газар болон нийслэлийн холбогдох байгууллагын төлөөлөлтэй уулзаж, нийслэлийн ерөнхий боловсролын сургуулийн хүртээмжийг нэмэгдүүлэх чиглэлээр хамтын ажиллагааны боломжийн талаар санал солилцов. Уулзалтын үеэр нийслэлийн боловсролын салбарт тулгамдаж буй асуудал, хүн амын өсөлт, шилжилт хөдөлгөөнтэй уялдан сургуулийн хүчин чадлыг нэмэгдүүлэх шаардлагын талаар танилцууллаа.
Нийслэл Улаанбаатар хотод Монгол Улсын нийт хүн амын болон боловсролын байгууллагын 50 орчим хувь төвлөрөн үйл ажиллагаа явуулж байна. 2022 оноос эхлэн Боловсролын яам, нийслэл хамтран цэцэрлэгийн хүртээмжийг нэмэгдүүлэх чиглэлээр үе шаттай арга хэмжээг хэрэгжүүлсний үр дүнд өнөөдрийн байдлаар хүсэлт гаргасан бүх хүүхдийг цэцэрлэгт хамруулах боломжийг бүрдүүлээд байна. Энэхүү ажлыг төр, хувийн хэвшлийн түншлэл, улсын болон нийслэлийн төсвийн хөрөнгө оруулалтаар шинэ цэцэрлэг барих, барилга түрээслэх, худалдан авах зэрэг олон талт арга хэмжээтэй уялдуулан хэрэгжүүлсэн. Сургуулийн насны хүүхдийн тоо 2030 он хүртэл өсөх төлөвтэй. Судалгаагаар шинээр 84 сургууль шаардлагатай гэсэн судалгаа гарсан байна. Үүнийг хэрэгжүүлэхэд ойролцоогоор 2 их наяд төгрөгийн хөрөнгө оруулалт шаардлагатай бөгөөд зөвхөн улсын болон нийслэлийн төсвийн эх үүсвэрээр бүрэн шийдвэрлэх боломж хязгаарлагдмал байгааг онцоллоо.
Сургуулийн хүртээмжийг нэмэгдүүлэх хүрээнд олон улсын хөгжлийн түнш байгууллагуудын зээл, буцалтгүй тусламж, хөрөнгө оруулалтын боломжийг ашиглах чиглэлээр Дэлхийн банктай хамтын ажиллагааг өргөжүүлэх, хэрэгжүүлж болох төсөл, хөтөлбөрийн талаар санал солилцож, цаашдын хамтын ажиллагааны чиглэлийг хэлэлцэв.
Дэлхийн банкны Ахлах эдийн засагч Salman Asim нийслэлийн боловсролын салбарын хүртээмж, чанарыг сайжруулахад хамтын ажиллагааг үргэлжлүүлэн бэхжүүлэх нь чухал болохыг онцолж, цаашид бодит үр дүнд чиглэсэн хамтарсан төслүүдийг шуурхай, хэрэгжүүлэхэд анхаарч ажиллахаа илэрхийлэв. Уулзалтад Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч Г.Жаргалсайхан, Нийслэлийн Боловсролын газрын дарга Б.Амартүвшин, Бодлогын судалгаа шинжилгээний төвийн Систем, динамик загварчлалын газрын захирал М.Гэрэлт-Од, Нийслэлийн Боловсролын газрын Санхүү, хөрөнгө оруулалтын хэлтсийн дарга О.Бадамсэрээжид, Нийслэлийн Газар зохион байгуулалтын албаны Газар чөлөөлөх гуравдугаар хэлтсийн дарга Т.Тува, Дэлхийн банкны Ахлах эдийн засагч Salman Asim, Дэлхийн банкны Хөрөнгө оруулалтын ахлах мэргэжилтэн Ritesh Vi нар оролцлоо.
Эх сурвалж: ulaanbaatar.mn
