Зуны бүтээн байгуулалт, зам засварын ажлууд бүрэн дуусаагүй, сольж шинэчлэх ёстой замын хашлага, боржурын ажил үргэлжилсээр байхад намар айсуй. Үүн дээр зуны үерийн дараах ус зайлуулах шугам, далан суваг, үерийн хамгаалалтын байгууламжийн асуудал ч байна. Улаанбаатарын хувьд энэ нь зүгээр нэг улирал солигдож буй хэрэг биш. Зуны халуунд үүссэн асуудлуудын араас өвлийн хүйтэн, утаа, түгжрэл, халтиргаа, дулаан, цахилгааны тасалдал зэрэг дараагийн сорилтууд хүлээж байна.

Нийслэлийн 2026-2027 оны өвөлжилтийн бэлтгэл ажлыг эртнээс эхлүүлсэн. Өнгөрсөн долдугаар сарын байдлаар бэлтгэл 60 орчим хувийн гүйцэтгэлтэй байсан талаар мэдээлж байв. Мөн эрчим хүчний ачааллыг нэмэгдүүлэх ажлыг нийслэлийн таван байршилд эхлүүлсэн гэж мэдээлсэн.

Гэхдээ наймдугаар сарын сүүл болж, өвлийн улирал хэдхэн сарын дараа ирэх гэж байна. Тэгвэл өнөөдөр бэлтгэл ажил яг хэдэн хувийн гүйцэтгэлтэй байна вэ? Засвар, шинэчлэлийн хэдэн ажил бодитоор дууссан, хэд нь цаасан дээр үлдсэн бэ?

Өвөл бүр ижил асуудал давтагддаг. Хүйтрэхээр дулаан муу байна, цахилгаан тасарлаа, зам халтирлаа, утаа нэмэгдлээ, сургууль цэцэрлэгийн дулаан хангалтгүй байна гэх асуудал сөхөгдөнө. Харин энэ бүхнийг урьдчилан шийдэх ёстой.

Тиймээс “өвөлжилтийн бэлтгэл хангагдсан” гэсэн тайлангаас илүүтэй иргэд өвөлд бодитоор бэлэн болсон эсэх нь чухал.

Нийслэл энэ өвөл өмнөх жилүүдийн алдааг давтахгүй гэж найдаж байна. Дулаан, цахилгаан, ус, сургууль цэцэрлэг, зам талбай, халтиргаа цас, гэр хорооллын түлшний хангамж гээд өвөлд хамаарах бүх асуудлыг одооноос бодитоор шалгах шаардлагатай.

Зуны асуудлаа шийдэж амжаагүй байж өвөл ирсний дараа арга хэмжээ авах нь бэлтгэл биш. Асуудал үүсэхээс өмнө шийдэх нь жинхэнэ өвөлжилтийн бэлтгэл юм.

Иргэдийн асуулт энгийн: Энэ өвөл өмнөх өвлөөс юугаараа өөр байх вэ?

Г.Энхбаяр