Улсын их хурлын Хөгжлийн банкийг хянан шалгах түр хорооны хуралдаанаар түр хорооны дарга Б.Энхбаяр УИХ-ын гишүүн, Эдийн засаг, хөгжлийн сайд Ч.Хүрэлбаатарыг АТГ-т шалгуулна гэж мэдэгдлээ.
Тодруулбал, хяналт шалгалтын ажлын хүрээнд өмнө нь Хөгжлийн банкинд хийж байсан шалгалтуудын дүгнэлтийг албажуулах тогтоол гарсан байна. Эдгээр баримт бичгийг албажуулах явцад 2020 онд Монголбанкны Ерөнхийлөгч Б.Лхагвасүрэн, тухайн үеийн Сангийн сайд Ч.Хүрэлбаатар нарын хийсэн хяналт шалгалтын материалыг ирүүлээгүй аж.
Үүнийг тухайн үеийн Сангийн сайд албажуулахгүй, нуун дарагдуулсан гэж Түр хорооны дарга Б.Энхбаяр мэдэгдлээ. Үүнтэй холбогдуулан түүнийг эс үйлдэл гаргаж, албан тушаалын гэмт хэргийн шинжтэй гэж үзсэн тул Авлигатай тэмцэх газар шалгуулна, гэрчээр дуудаж асууна гэсэн юм.
Энэ талаар одоогийн Сангийн сайд Б.Жавхлан тайлбар өгөв. Тэрбээр "Манайхаас материал нэхэхэд энэ оны арваннэгдүгээр сарын 10-нд шалгалтын материалыг иж бүрнээр хүргүүлсэн. 2021 оны арванхоёрдугаар сарын 21-нд Монголбанкнаас хийсэн шалгалтын дагуу Монголбанкны Ерөнхийлөгчийн тушаалыг хүргүүлсэн. Ингээд Засгийн газар Хөгжлийн банкны нөхцөл байдалд дүгнэлт хийгээд асуудал ил болсон" гэлээ.
