Япон жуулчныг Эрдэнэ-Зуу үзүүлэхээр аваад давхиж. Давхиж давхиж, явж явж, өнөөх чинь энэ шүү дээ гээд манайхан заасан шиг байдаг. Үүнийг үзүүлэх гэж энэ хол ингэж давхиж ирээ юү гэж мөнөөх жуулчин ядарч зүдэрсэндээ халаглан уйлсан гэдэг яриа байдаг. Үнэн ч байх.
Орос 69 машинд суусан нэг япон жуулчин мөн хэлсэн байдаг. Оросууд үнэхээр сайн машин хийж. Ганц юмыг ор тас мартжээ гэж. Юуг нь мартаж вэ гэсэн, хүн суухыг мартжээ л гэсэн гэдэг үгтэй. Манай аялал жуулчлалын орчин яг иймэрхүү л байгаа.
Онгон тансаг байгаль нь байгаа, үзэж харах юм нь байгаа, иргэншил соёл нь байгаа. Гэтэл үйлчилгээ нь, дэд бүтэц нь, соёл нь үгүй л байгаа.
Засгийн газар энэ оныг аялал жуулчлалын жил болгон зарлачихсан. Мөн тэгээд хуулинд Аялал жуулчлалын тусгай сан байгуулахаар зааж. Агаараар зорчигч тээвэрлэхэд дэмжлэг үзүүлэх, улирлын хамаарлыг бууруулах, шинэ бүтээгдэхүүн үйлчилгээ бий болгох, сурталчилгааг дэмжихэд гэж агуулгыг нь гаргасан байна. Гарцаагүй л хийх хэрэгтэй зүйлс мөн үү гэвэл мөн.
Гэвч УИХ-ын зарим гишүүд, тухайлбал Ц.Цэрэнпунцаг дэмжихгүй гэдгээ илэрхийлсэнийг “Өнөөдөр” сонин тэмдэглээд, “Эрх мэдэлтнүүд цөлмөдөг тусгай сан аялал жуулчлалд хэрэггүй” нийтлэлээрээ сөрж шүүмжилжээ. Арга ч үгүй юм байх аа даа, сан болгоныг манай эрх мэдэлтнүүд тоночихдог болохоор. Байгаль орчин, аялал жуулчлалын сайд гэж Эрдэнэт хот руу өдөр бүр шахуу "жуулчилсан" хүн байх. Сонгууль л бодсон тархитай.
Аялал жуулчлалаа хөгжүүлэхийн төлөө эрхбиш Эрдэнэт рүү ухасхийгээд байдаг шигээ тэмцэж л байгаа байлгүй. Лавтайяа, Эрдэнэт тун дөхсөн постуудын орчны бие засах газрууд өнгө зассан, бас ч гэж боловсон болсон харагдсан шүү. Оны заагаар байх, Хөшөгийн хөндийн онгоцны буудалд нэг морилсон.
Дагасан нэг долдой нь бүхэл бүтэн яамны сайд ирээд байхад гээд л сүржигнэж байгаа нь шүүмжлэгдээд л байсан. Тал яам, тал сайд гэж юу байв гэж, үйлс зорилго нь л гол нь бүтэн баймаар байна аа, ажлын нь арга барил, гүйцэтгэл л бүтэн баймаар байна, Бат-Эрдэнэ сайд аа.
Хүмүүс хэлж байна, Тэрэлжид нэг хонох уу, Жининьд тав хонох уу гэж мэтгэн хэлэлцэж байна. Жининьд тав хоноод, стандарт бүхий л үйлчилгээг аваад ирэхэд 650-950 мянган төгрөгийн хооронд байх шиг байна. Хил даваад, тавын тав хоноод, таваас гурван одтой буудалд буугаад, иллэг бариагаа хийлгээд, рашаан усандаа ороод, аялал жуулчлалын амт шимтийг мэдрээд тэр шүү дээ.
Гэтэл манай жуулчлалын гол талбар, орон зай болох Тэрэлжид яг энэ мөнгөөр аятайхан ганц хоночихъё гэхнээ нь хүрэлцэхгүй шахуу байх шиг байна. Үнэн дээ. Тэрэлжийн захын баазад хоноод өглөөн цай хүртэхэд Жининь ороод ирэх зардлын ихэнх нь далдарна.
За яг эндээс л, манай аялал жуулчлалын бодлогын, практик үнэн байдлын зураг нэвт тод харагдаж байгаа юм. Үнийн асуудлаа эвтэй болгох, тохь тухаа засах, дэд бүтэцээ наашлуулах, үйлчилгээгээ ялдам болгохоос эхлээд мөн чиг олон асуудал байна даа. Шат дараатай, энэ бүхнээ аятайхан хийгээсэй.
Ажил хийнэ л гэж яамны сайд болж, залгуулаад УИХ-ын гишүүн болохыг боддог байлгүй дээ.
Бат-Өлзийн Бат-Эрдэнэ сайд энэ зун, Засгаас аялал жуулчлалын жил болгосон энэ жилд хэрхэн ажиллахаас түүний мөн чанар тов тод харагдана. Хэрхэн ажиллахыг нь харж, дүн тавих замаар энэ хүнийг өгсүүлэх үү, болих уу гэдгийг ард түмэн шийднэ.
Жининьд тав хонох уу, Тэрэлжид нэг хонох уу гэдэг сонголтын зөрүүг, чанарыг Б.Бат-Эрдэнээс нэхье, та минь ээ!.
Б.БАЯР
Amlalt.mn
