Засгийн газрын лхагва гаригийн хуралдаанаар ШШГЕГ-ын дарга Д.Загджавыг чөлөөлж, ЦЕГ-ын дэд дарга байсан О.Амарсанааг томиллоо.
О.Амарсанаа албан тушаал ахих тухай бор шувуу аль эртнээс "нисч" эхэлсэн. Тодруулбал, ЦЕГ-ын дарга Ж.Болдыг Элчингээр явуулж, оронд нь О.Амарсанаагаар цагдаагийн байгууллагыг толгойлуулахаар болсон тухай мэдээлэл гараад удаж байв. Тэгвэл ямартаа ч Засгийн газрын хэмжээнд томилгоо хийгдэж, албан тушаалын эрэмбээрээ генералд хүрдэг ШШГЕГ-ыг толгойлохоор болжээ.
О.Амарсанаа нь 2001 оноос Төв аймгийн Цагдаагийн газарт эрүүгийн төлөөлөгчөөр ажлын гараагаа эхэлж, 2021 онд Хууль зүй, дотоод хэргийн сайд Х.Нямбаатарын тушаалаар ЦЕГ-ын дэд даргын албанд очоод байв. Түүний ХОМ-ийг харахад 33 сая төгрөгийн орлоготой, нэг орон сууцтай, автомашингуй, 25 сая төгрөгийн хадгаламжтай, 200 сая төгрөгийн зээлтэй гэж мэдүүлжээ. О.Амарсанаа нь Хэнтий аймгаас гаралтай. Ерөнхийлөгч У.Хүрэлсүхийн эээ дүү буюу төрсөн эгчийнх нь хүү юм байна.
Зөвхөн энэ удаагийн томилгооноос улбаалаад харахад Ерөнхийлөгч У.Хүрэлсүхийн хамаарал бүхий олон хүн төрийн өндөр дээд, хууль хүчний албанд зүтгэж эхлээд байна. Тухайлбал, төрсөн дүүгийнх нь эхнэр Б.Туяацэцэг Ерөнхийлөгчийн Тамгын газрын дэд дарга бол хадам ах Л.Болдбаатар нь ОБЕГ-ын дэд даргаар томилогдож бригадын генерал цолоор шагнуулж байв. Түүгээр зогсохгүй бригадын генерал хадам ахынх нь эхнэр С.Цэрэнчимэд Гаалийн төв лабораторийн дарга, төрсөн ах У.Ганболдын хүү Г.Гандөл Ерөнхийлөгчийн Тамгын газарт газрын дарга, Г.Гандөлийн дүү Г.Гантулга Зам, тээврийн хөгжлийн яамны Авто тээврийн бодлогын хэрэгжилтийг зохицуулах газрын даргаар ажиллаж байгаа юм.
Эх сурвалж: Өдрийн сонин
