Хөдөлмөрийн Үндэсний Нам улс төрийн манлайлал, шийдвэр гаргах түвшинд эмэгтэйчүүдийн оролцоог нэмэгдүүлэх, "ХҮН 50:50" цогц хөтөлбөрөө танилцууллаа. Энэхүү бодлогынхоо хүрээнд ХҮН нам бүх шатны сонгуульд нэр дэвшигчдийн хүйсийн тэгш байдлыг хангах, үүний дотор УИХ, аймаг, нийслэл, сум дүүргийн иргэдийн төлөөлөгчдийн сонгуульд нийт нэр дэвшигчдийн хүйсийн харьцааг 50:50 байлгах, улс төр, намын үйл ажиллагаанд идэвхтэй оролцуулах, цаашлаад нэр дэвших эмэгтэйчүүдийн тоог нэмэгдүүлэхээ мэдэгдэв.
Уг хөтөлбөрөө баталсны үндсэн дээр Хөдөлмөрийн Үндэсний Нам "ХҮН 50:50" чуулга уулзалтыг зохион байгуулсан юм.
Энэ үеэр ХҮН намын удирдах зөвлөлийн гишүүн Б.Мөнхсоёл ярихдаа “УИХ-д гарсан 76 гишүүний 17 хувь нь л эмэгтэй гишүүд байна. Үүнийг өндөр амжилт гэж зарим талаар дүгнэдэг. Гэтэл үгүй юм.
Мөн их хуралд сонгогдсон 76 гишүүн нийт сонгогчдын саналын зөвхөн 42 хувийг төлөөлж байгаа. Бусад 60-аад хувь нь хааччихав. Тэгэхээр энэ нь өөрөө сонгуулийн системийн гажгийг, тогтолцооны сул тал, шударга бус үр дүнг илэрхийлж байна гэсэн үг.
Нөгөө талдаа эмэгтэйчүүд яагаад ийм цөөхөн байна вэ гэхээр гэр бүлийн дэмжлэг, санхүү мөнгөний чадамжгүй байдал, нийгмийн хэвшмэл хандлага, цаашлаад эрэгтэйчүүдийн дэмжлэг, намынх нь дэмжлэг, доторх болон гадаад шударга бус байдал зэрэг маш их саад бэрхшээлийг дурддаг. Үүнийг олон улсын болон дотоодын бүхий л судалгаанаас үзэж болно.
Тэгэхээр Хөдөлмөрийн Үндэсний Нам софт боломжуудыг бий болгоё. Эмэгтэйчүүдээ дэмжье, хамтаръя, тусалъя. Та бүхэнд итгэл, зориг, урам өгье, сургая. Хамтраад баг болоод ажиллая. Нийгэмд дуу хоолойгоо гаргахад түлхэц өгье гэж байгаа юм” гэв.
