Монголын ард түмнийг хоёр хэсэгт хувааж үзэхэд болно. Мэдээлэл, эрх мэдэлд ойр “хулгайчид”. Нөгөө талд жирийн иргэн. Үүнийг боловсролын зээлийн сангийн тонологоос яруу тодоор харж болж байна. Энэ тонологыг УИХ, Засгийн газрын гишүүдийн үрс л авчээ. Хуу хамж. Монголын шударга ёс энэ. Монголын үнэн нүүр царай энэ. Жирийн ардын хүүхдэд эмчлүүлэх тохой булан олдохгүй эмнэлгийн хонгилд овоороостой. Сургууль соёл бүх юм нь мөн адил.
Монголын парламент Үндсэн хуулийн өөрчлөлтийг хийх хэлэлцүүлэг хийж байна. Сонгуулийн хуулиа мөн хэлэлцэнэ, залгуулаад. Үүндээ одоо нэг л заалтыг тусгаж өг өө. Эрх мэдэл, мэдээлэлд ойрын боломжийг ашиглан аливаа бусармагт нэр холбогдсон бүгдийг ахиж албан тушаалын сэнтийд хоншоор цухуйлгуулж болохгүйг хатуу хуульчлах хэрэгтэй байна. Чухамхүү ингэж байж л Монголын төр ариусна. Шударга ёс тогтоно.
Өнөөдөр эрх баригч намын бүлгийн дарга иргэд Их хурлын гишүүдийг муулсаар байгаад нэр хүндгүй болгосон гэж хэлж байна. Нөхөр Д. Тогтохсүрэн зөвхөн энэ үгийнхээ төлөө албан тушаалаасаа огцрох хэрэгтэй. Монголын төрд дахин ойртохгүй байх нь үндэсний эрх ашиг. Парламентад суудалтай гуравдагч намын дарга Т. Доржханд маш олон зүйл ярьдаг. Дэвшилтэт гэмээр. Гэтэл хүүхэд нь аанай л нөгөө тонологын бусдын адил хэзээний боловсролын зээл авч. УИХ-ын гишүүн болсон өдрөөсөө энэ бүхнийг зарлаад, засаж залруулж яагаад болоогүй юм бэ. Тогмидын Доржханд одоо чухам энэ л асуудлаараа улс төрөөс бүрмөсөн бууж, үүгээрээ цэвэр ёс суртахууны зарчим домог бүтээх нь, улс төрийн ирээдүйн олон боломжоос нь ч илүү үнэ цэнтэй юм энэ улсдаа гэдгийг эргэлзэлгүй ойлгож, энэ өнцгөөс ард түмэндээ мэдээлэл хийх хэрэгтэй.
Монголын улс төрчид яагаад ийм өлөн хомхой, арчаагүй сувдаг байдаг юм бэ. Жижиг дунд үйлдвэрлэл, мал аж ахуй, газар тариалангийн сангууд, Хөгжлийн банк, тендер, концесс, зээл , ерөөсөө энэ улсад байгаа бүх боломжийг Монголын улс төрчид үеийн үед тонож дээрэмдэж, улсаа, иргэдээ шулсаар, өөрсдөө үе уламжлан төрийг зайдалж ирлээ. Нүгэл гэж байдаг гэдэг биз дээ. Монголын улс төрчдөд нүгэл хүрнэ гэж байдаггүй юм болов уу.
Богд уулыг тойроод бүгд ам амаар нь аваад байшин барьчихсан. Бүгд улс төрчид. Хэн нь бариад, хэн нь барьж болдоггүй юм гэж архираад л байшин барьцгаагаад, зараад суугаад байна. Хүн чулууны хонхрын бүх газрыг мөн эдгээр улс төрчид л зарсан. Бүгдийг нь шүү. Тэгээд тэр мөнгөөрөө өлөн ходоодны сонгууль хийж улс төрд хэдэн арван жилээр ноёлж байна. Зөвхөн идлэг уулгаараа л уралдана. Улсдаа өнгөтэй өөдтэй нэг ч зүйл хийхгүй.
Улсдаа орлого оруулдаг хоёрхон боломжийнхоо нэг нүүрсийг дөчин их наядаар нь тоносон. Нүүрсээ зарах төмөр замаа хил тулгаад “хаячихсан”. Гарц байхгүй. Газрын тосоо боловсруулахгүй, малын түүхий эдээ боловсруулахгүй. Зүгээр л зөвхөн дээрэм тонуулын сэтгэхүй шуналаар, ширэнгийн хуулиар улс орныг зайдлан тохуурхана. Тэгээд энэ дэлхийн хамгийн үнэтэй бүхнийг хэрэглэн гайхуулж, хүн ардаасаа ялгаран ялгаран доромжилж, ертөнцийн шившиг болно.
Сангийн, эдийн засгийн сайдууд нь нүүрс, зэс зарсан мөнгөө л яриад суугаад байна. Өөр эдийн засгийн ямар ч солонгорол үл үүсгэх чадвартай. Цалин тэтгэврийг нэмнээ гэдэг ганц хуурмаг үгтэй. Тэдний хувьд ард түмэн үнэхээр хэн ч биш болоод маш удаж байна. Доромжлон дээрэлхэж, бах таваа хангаж яагаад дуусдаггүй юм бол.
Өтгөн шингэнээ дээр нь асгаад байхад үг дуугарч, засаж залруулахыг оройлдоггүй ард түмэнд ямар үг хэлэх билээ гэж их Лодонгийн Түдэв үнэхээр гаслан гансрахын туйл болон хэлж байжээ. Ард түмнийг ийм хэмжээнд эрх баригчид, төр баригчид доороо нухачжээ. Монголын төр гэж оршиж байна. Төрийн амин үнэт шүншиг жанлав гэж байдаг аваас Монголын төрийн дээр шавааралдсан бирд шимнусуудыг бүрмөсөн арилгаж хайрлаач гэж үнэхээр мөргөж сөгдөх болжээ, энэ ард түмэн. Мөргөж сөгдөж ч байгаа.
Дуурийн дуучид нь сая таван зуугийн цалинтай болгож өгөөч ээ гэж залбирахаас илүү яах билээ. Ганц нөмрөг даавуу, таяг, нүдний шилнээс өөр хөрөнгөгүй Махатма Ганди ард түмнийхээ мөнхийн эцэг болж чадсан. Шударга ариунд үндэслэсэн нөр сэтгэлээр эх орон, ард түмнийхээ төлөө зүтгэсний тул. Монголд Ганди хэрэгтэй байна. Төрийн ордноос мянган алхмын зайд монголчууд нүхэн жорлонд морь харж байна. Үүнээс илүү нотолгоо хэрэгтэй гэж үү.
З.БАЯРАА
Amlalt.mn
