Монгол төрийн нэр хүндийг Монголын улс төрчид унагаж байна
Улс орныхоо хөгжлийг бодохоос илүүтэй амин хувийн ашиг хонжоог хайдаг хүмүүс улс төрд яаж ийгээд орчихдог болоод удаж байна. Үүний нэг шалтгаан нь сонгуулийн мажоратори тогтолцоо буюу парламентын гишүүнийг тойргоос сонгодог зарчим. 5000-10000 сонгогчийн саналыг авч УИХ-ын гишүүн болохын тулд өөрийн хөрөнгө, бэлээ зузаатгаж байгаад сонгуулиар тэрнийхээ хэсэгхэн хувийг зарлагдаж, зарлагадаж ч гэж дээ сонгогчийн саналыг “худалдан авахад” зарцуулаад гишүүн болчихно. Нэгэнт нэлээд зардал гаргасан хүн тэрнийгээ хэд нугалж олохыг гишүүний эрхэм үүрэг мэт ойлгоно.
Ийм л учраас сонгуулийн тогтолцоог ядаж талыг нь пропорциональ буюу тойрогт нэр дэвшдэг поп улс төрчдийг сонгодог биш намд саналаа өгдөг зарчмыг хэрэгжүүлэхийг судлаачид сануулаад байгаа аж.
Нэгэнт тойргийнхоо сонгогчдын олонхын саналыг аваад УИХ-ын гишүүн болчихвол эрх мэдэл, албан тушаалаа ашиглан төрөөс хусаж, хулгайлж болох бүгдийг тэд өөрсдөө болон өөрсдийн хамаарал бүхий этгээдүүдээрээ дамжуулан “хусна”.
Урд хилээр нүүрс зөөж гаргаж байгаа ихэнх компаниудын хойно мөнөөх л улс төрчдийн нэр “дуулдана”. Улсад орох ёстой орлогын ихэнх хувь нь мань сайд дарга нарын халаасанд орно. Хоржоонтой нь олны ярьж байгаагаар нүүрс зөөврийн автомашины бизнесийг “атгадаг”, нам төрийн ажлыг хослон барьдаг хамгийн нөлөө бүхий улс төрч нь өөрөө “нүүрсний хулгайг илрүүлнэ” гээд ичих ч үгүй яриад зогсож байх юм гэнэ билээ.
Бас нэг сайд нь ажлын бус цагаар урд хөршийн бизнесменүүдтэй “шоудсанаа” зүгээр л “би амралтын цагаар юу хийх нь та нарт ямар хамаатай юм” гээд хэлчихгүй, Ерөнхий сайдын айлчлалын асуудлыг, хоёр улсын хөгжлийн бодлогыг “пивоны ширээний ард ярьсан” гээд хэлчхэж байх шиг.
ЖДҮ-ийг дэмжих сан, Газар тариалангийн сан, Мал аж ахуйг дэмжих сан, Боловсролын зээлийн сан зэрэг төрөөс санхүүжүүлж тухайн салбарт хөрөнгө оруулалт хийх ёстой сангуудыг мөнөөх л улс төрчид мэдээлэлд ойр байгаа байдлаа ашиглаад авчихна. Концесс, Хөгжлийн банк, Нүүрсний хулгайд өнөөх л улс төрчид ба тэдний хамаарал бүхий этгээдүүд холбогдоно.
Жирийн иргэд 10 мянган төгрөг хулгайлаад шоронд орж байхад 10 тэрбумыг хулгайлаад шүүгээндээ нуучихсан газрын дарга, нүүрсний хулгайн мөнгөө алтан баримал болгоод гэртээ хадгалчихсан УИХ-ын гишүүн өнөөдрийг хүртэл хууль шүүхийн хаалга татаагүй явна.
Тэдний ийм бусармаг, хулгай худал нь дэндсэн үйлдлүүдээс болоод улс орны хөгжил гацаж, эгэл жирийн мөрөөрөө ажлаа хийж байгаа төрийн албан хаагч бүрийг иргэд хулгайч, худалч гэж харах боллоо.
Төрийн албан хаагчид нь энэ мэт байдал, дээр нь авдаг цалин нь бага, ажлын ачаалал нь их, аархуу дарга нарын ааш, ард иргэдийн зүхлээс болоод ажлаасаа гарах өргөдлөө олноороо өгөхөд хүрлээ.
Товчхондоо монгол төрийн нэр хүндийг дүүрэг хороонд ажиллаж байгаа төрийн албан хаагч биш бусармаг үйлдэлтэй УИХ-ын гишүүд, хулгайн сэтгэлгээтэй сайд дарга нар л унагаж байна.
Ц.Мөнх
Amlalt.mn
