Шивээхүрэн, Сэхэгийн хорин долоон километр төмөр зам тавих ажил эхэлж байна. Ачаа эргэлт хоёр дахин нэмэгдэх нь. Хувийн хэвшлийн, нэг үгээр хэлбэл МАК, Өсөх зоос тэргүүтэн компаниуд өөрсдөө хөрөнгөө гаргаж энэ бүтээн байгуулалтыг хийх юм байна. Ерөнхий сайд боомтын сэргэлт өндийж байна. Аж үйлдвэржилтийн сэргэлтийн ач холбогдлыг өргөнө гэж хэлж байна.
Улс айл иймэрхүү л байх учиртай л даа. Манай улсын дотоод авлига, албан тушаалын завхрал үлэмж гаарсан нь Засгийн газарт дарамт ачаа болж байгаа нь гарцаагүй үнэн л дээ. Угтаан бол Засгийн газар гэдэг бол аж үйлдвэржилт, худалдаа арилжаа, хөрөнгө оруулалт, эдийн засгийн солонгорлыг л үлэмж тэлэн, ажил мундрааж байх учиртай. Өдөр өдрийн нь ажил энэ л хэмнэл, ажил хөдөлмөрийн дэвшлүүдээр өрөгдөж, нөхөгдөж байх учиртай юм. Ингэхдээ хувийн хэвшлээ дэмжих, хувийн хэвшил, төр хоёрын эв нийцэл төгс түншлэл хөгжиж байх учиртай. Тэр тусмаа хувийн хэвшилд бүтээн байгуулах, орлого олох, татвар арвижих үндэслэлийг л хангах бололцоог эн тэргүүнд харж, үүгээрээ Засгийн газраа тэнхээжүүлэн тамиржуулж байх ёстой. Ерөнхий сайд Л. Оюун-Эрдэнэ үүнийг нэлээд язгуураас нь хөөж ажиллаж эхэллээ гэж ойлгогдож байгаа.
Жил бүрийн “Топ 100” гээд шалгаруулдаг. Төрийн өмчийн үйлдвэрүүдийг өнөө жил түүнд оруулсангүй. Зөв шүү дээ. Төрийн өмчтүүдийг эл сунгаанд оруулж, өрсөлдүүлэх маяг төлөв нь огтоос оновчгүй юм. Угаас Монгол улсын үндсэн мөнгө олж байгаа зэс, нүүрсний үнэмлэхүй бүтээгдэхүүн борлуулах Эрдэнэт үйлдвэр, Эрдэнэс таван толгой тэргүүтнийг топод оруулан жил бүр манлайлуулж байхын утга учир ер зохисгүй. Харин хувийн хэвшлийн жинхэнэ бүтээн байгуулагч, эрсдэл шалгарлыг туулан, улсад татвараа төлж, инновац, шинэ жишиг, ахиц, өөрчлөлтийг авчрагч болгоныгоо өрсөлдүүлэн шалгаруулж, урмыг тэлэх өнөө жилийн хандлага бол жинхэнэ шинэ эхлэл, шинэ эдийн засгийн цуурай гэж хэлж болох.
“МАК”-ын Б. Нямтайшир хэвлэлд урам бүхий ярилцлага өгсөн харагдана. Монголын аж үйлдвэржилтийн тодорхой тэргүүн төлөөлөгч түүнийг “Аж үйлдвэрийн үндэсний хороо”-ы дэд дарга болгож. Тэрбээр энэ хандлагыг шинэлэг гэж хэлээд, Ерөнхий сайдын төр бизнес эрхлэгчдийн өмнүүр ордгийг больё гэдэг үгийг сайн эхлэл, жинхэнэ оновчтой хандлагын үүд гэж тодорхойлж. Юу үнэн, энэ үнэн.
Улс төрийн албан тушаалтан томилогдоод, сонгуулиас сонгуулийн хооронд үлгэн салган , улс төржсөн өнгөөр байдаг энэ хандлагыг засаж, Аж үйлдвэрийн үндэсний хороо үйлдвэрээр зогсохгүй, эрчим хүч, ус, гадаад зах зээл, боловсон хүчин, хууль эрх зүйн орчин, стандарт хэмжил зүйг боловсронгуй болгоход нэн идэвхтэй ажиллахаа нөхөр Б.Нямтайшир хэлжээ. Урам орсон хүний үг, төр засгаа зөв хандлага, эхлэл үзүүлж байгаад баярласан үйлдвэрлэгчдийн үгийг илэрхийлсэн байр суурийг Б. Нямтайшир хэлсэн байна. Тэгээд тэрээр энэ намар гэхэд чингэлэг тээврийн терминал, төмөр замын бүтээн байгуулалт бүрэн ашиглалтад орно гэж итгэлтэйгээр мэдэгдсэн байна.
Зам тээврийн сайд С. Бямбацогт Ерөнхий сайдад тулх болж ажиллаж байгаа харагдах. Тэрбээр, агаарын тээврийн орон зайд ихээхэн шинэлэг, иргэдэд ээлтэй үйлчилгээний эхийг тавьж байна. Орон нутгийн нислэгүүдийг өргөтгөж, үнэ тарифыг зохисжуулж, гадаад нислэгүүдийн давтамж, цар хүрээг нэмэгдүүлэн идэвхтэй ажиллаж байгааг сайшаам.
Нөгөөтэйгүүр төмөр замын мухар байдлыг гарцжуулах, эргэлтэд жинхэнэ утгаар оруулах ажилд хоёргүй зүтгэж байгаа нь улс эх орны эдийн засгийн хөгжилд үнэхээр тустай юм. Өнгөтэй өөдтэй айлын ажил мундарч, өглөг хишиг халиастай байдаг үгтэй. Засгийн газар энэ үгийн утга учрыг бодогдуулам ажиллах нь нэн тустай.
Нүүрсний хулгай, боловсролын зээлийн сангийн тонологоос эхлээд Засгийн газрын тэмцэх ёстой олон ажил байгаа ч , Боомтуудыг цахимжуулж, хяналтыг жишигжүүлэн, эдүгээ аж үйлдвэржилт , бүтээн байгуулалтыг эрчимжүүлэх нь гарцаагүй оноолт ажил нь дамжиггүй. Хөгжил, хөрөнгө оруулалт , бүтээн байгуулалт л зөв явж, үнэмлэхүй хөгжиж байж, улс оронд жинхэнэ бодит сэргэлт, шударга ёс тогтоно. Л. Оюун-Эрдэнэ үүнийг онож бодож байгаа харагдах.
З.БАЯРАА
Amlalt.mn
