Д.Амарбаясгалан Алтанширээг зорьжээ. Энэ тун мэдрэмжтэй томилолт. Монгол улс шатахуунаа хийдэг болъё, газрын тосоо эцсийн бүтээгдэхүүн болгоё гээд У.Хүрэлсүх Ерөнхий сайд байхдаа энэ ажлыг эхлүүлсэн. Тэрхүү өөдрөг эхлэл биежил нь сайнгүй байгаа үнэн.
Технологи зөрсөн, ажил удаашралтай, төсөв санхүү нь саатсан, төслийг удирдаж байгаа Д.Алтанцэцэгийн нь эрх ашиг, сонирхол, ажил гүйцэтгэгчидтэй харьцаж байгаа хандлага гээд олон талаар Алтанширээгийн газрын тосны үйлдвэрийн бүтээн байгуулалтын үйл ажиллагаанд үнэлэлт, дүгнэлт өгч цаашдын ахиц, өөрчлөлтийг хийх шаардлагатай байгаад Засгийн хэрэг эрхлэхийн дарга шан татах нь ээ, янз нь.
Энэ нь зөв, 2025 оноос зээлээ эргүүлэн төлж эхлэх Энэтхэгийн засгийн газраас олгож буй хөнгөлттэй зээл болох 1,1 тэрбум долларын санхүүжилттэй энэ төсөл цар тахал, бусад олон шалтгаанаар нэмэлт санхүүжилт 30 хүртэл хувьд өссөн гээд адармаатай зүйл их байна.
Тийм ч учраас энэ том бүтээн байгуулалт, өдгөө цагийн улс орны удирдагчдын хэтийн түүхэнд хэрхэнээр бичигдэхээс үүтгэлтэй зэрэг олон шалтгааныг дагуулж байгаа. Бид хоёр хөршөөс хамааралтай шатахуунтай, түүнийг нь зөөн эх орондоо зардаг мопополистуудтай. Эл хачин байдлыг л өөрчилж байж хөгжил, дэвшил, бүтээн байгуулалтын жинхэнэ хаалга нээгдэх нь дамжиггүй.
Чухамхүү, энэ асуудлуудын эхийг барьж, тулгамдсан асуудлуудыг шийдвэрлэхээр Засгийн хэрэг эрхлэхийн дарга Д.Амарбаясгалан Алтанширээг зорьсон нь тодорхой байна. Уул уурхайн сайд Ж.Ганбаатар энэ үйлдвэрийн ашиглалтад оруулах хувь заяаг арагшлуулан хэлсээр, бүр 2027 он гэдэг тоо хэлээд, улмаар ”Эрдэнэс Монгол”-оос асуу гэдэг болсон. Одоо тэгэхээр С.Наранцогтоос асуух болж байгаа юм.
Д.Амарбаясгалангийн томилолтын багт С.Наранцогт мэдээж яваа биз. Д.Амарбаясгалан дарга Алтанширээгийн үйлдвэр яг хэзээ ашиглалтад орох юм, юунаас болж ажил саатаж цалгардаж байгаа, гүйцэтгэгч компаниудын санал гомдол, өөр олон учир шалтгааныг хэвлэл мэдээлэл, протокол байлцуулан С.Наранцогт захирлаас асууж тодруулах хэрэгтэй.
Мөн үйлдвэрийг ажлыг урагшлуулах, тулгамдсан асуудлуудыг нь шийдэх чиглэл гарцыг Засгийн газар дээр хэлэлцүүлж, үйлдвэрийн хотхоны барилга орон сууц барихад оролцож, хөрөнгө мөнгөө зарцуулсан ч эргүүлж авч чадахгүйд хүрч банкны барьцаанд орчихсон яваа хувийн хэвшлийнхэний асуудлыг шийдвэрлэж ажиллах нь чухал.
Ер нь энэ үйлдвэрийн ажлыг урагшлуулья гэвэл Засгийн газар шууд анхааралдаа авч, Сангийн яам хил гааль дээр үүссэн асуудлыг нь яаралтай шийдвэрлэж, удирдлагийн багийг нь шинэчлэн, шинэ менежментээр ажиллуулах мэргэжлийн хүн томилж удирдуулах шаардлагатай байгаа юм. Ингэж гэмээнэ Монгол улс газрын тосны үйлдвэрээ нээх өдрийг наашлуулах боломж бүрдэх юм.
Иймээс Д.Амарбаясгалангийн Алтанширээ дэх томилолт алтан шийдвэрүүд дагалдуулна гэдэгт итгэж, хүлээж байна.
З.БАЯР
Амлалт.мн
