Монголын улс төрд долоон жилийн өмнө орж ирсэн. Ирэх ирэхдээ тун дуу шуутай орж ирсэн. Арван зургаан онд Ардын нам ялж, энэ намын төлөө гэх болгон инээмсэглэлээр дүүрч байхад, ир бяр ихэдсэн засгаа анхнаас нь шүүмжлэх дуу хоолойг Хишгээгийн Нямбаатар эдүгээн Ерөнхий сайдтай нэгэн өнгөөр үзүүлж байв. Ингэж дуу шуутайхан, бурууд шүүмжит өнцөг ишийг үзүүлэн мэтгэсээр хорин онд дахин гишүүн болсон. Улмаа, Хууль зүйн сайд болсон.
Ерөнхий хэт өнгийн дагалдалгүй сөрсхийгээд, зөвийн талд шиг яваад байвал амжилт ирж, шалгаралд байлдаг нь зүй тогтол. Х.Нямбаатар энэ өнгөөр тогтонгишиж яваа улс төрч. Эдүгээ нийгэм Х. Нямбаатаргүй юмгүй боллоо гэцгээх болж. Арга ч үгүй юм байх аа даа, Ардын намын бүх сайдууд давхар дээлтэй, албан тушаалын дүүжинд цугаар суусан, мэдээлэл, эрх мэдэлд ойрынхоо буянаар зөвхөн өөрсдийн эрх ашгийн төлөө юунд ч дөрлүүлж мэдэх энэ цагт Л. Оюун-Эрдэнийн гайгүй итгэдэг ганц “унаа” нь энэхүү Х.Нямбаатар болохоор л Нямбаатаргүй юмгүй болсноор ойлгогдож байгаа юм.
Төр засгийн ямарваа чухал ажлын хэсэг, хурал хуй, ажлын даатгал, хэлэлцээр, ер бүхий л зүйл дээр Хишгээгийн Нямбаатар зогсож байх, сууж байх, уурлаж нэг байх, учирлаж нэг байх. Ерөнхийдөө төрийн хүний нарийн эр хар сур болох дамжлагаар жинхэнэ “элдүүлж “ байх шиг байна. Энэ нь өөрт нь сайн, бас төр засагт ч хэрэгтэй биз. Гагц хулгай зэлгий, хууль бусын аливаад л өртчихгүй бол. Хийж байгаа үйлс, үг хэл нь яавч тийм биш байхаар л нийгэмд дархлаажиж байх шиг байна.
“Орхон” их сургуулийг төгсөж хуульч болсон, энэ залуу одоо онцгой чухал бүхнийг мэдэж байх, удирдан чиглүүлж байх үүргийг хүлээн Засгийн газрын тулах цэг болоод байгаатай санал эс нийлэгсэд цөөн биз. Хамгийн сүүлд гэхэд ураны чиглэлээрх цаашид ажиллах, төслийн гэрээ хэлэлцээ, хэтийг яриад, алдах эрхгүй тухайгаа өгүүлээд байх шиг байна лээ. Энэ дундаа С.Баярыг нэг дурдаад, Оюу толгой дээрх шиг алдаанууд үл гаргах тухай ярьсанаас энэ хоёр хүн толхилцоод л харагдсан, нийгмийн сүлжээгээр. Аль алинд нь зөв буй байх. С.Баяр мөс зүсэн тэр гэрээг хийгээд хар гэрт хүртэл орсон.
Х.Нямбаатар С.Баяртай толхилцолгүй С.Баяраас баахан дөлөлгүй суралцах нь энэ ажлаа эвлэг хийн, эцэстээ хар гэрт орчихолгүй шиг байх бядтайгаар асуудлыг банжих нь өлзийтэй. Монголдоо тустай юм. Хишгээгийн Нямбаатар нэг тийм зөөлөн , аядуу дуу хоолойгоор учирлан ойлгуулах төлөв байдалтай ярьж харагддаг. Энэ нь Хууль зүйн өмнөх сайдуудын дүр төрхөөс их эерэг, энэ хэрээр харин бодьтой чинад үйл ажиллагааг нийгэм түүнээс хүсэх.
Х.Нямбаатар ч эрхэлсэн салбартаа эндүүтэй биш байхаар л ажиллаад байгаа учраас Засаг нь ч, олон түмэн ч Нямбаатаргүй юмгүй боллоо гэх байдлаар эерэг өнгөнөөс хэлэлцээд байна гэж таагдах. Х. Нямбаатарт ажил мундахгүй их байна аа. Хамгийн наад зах нь нүүрсний дөчин их наядын хулгайн асуудлыг эцэслэх “аймаар” ажил байна. Хэрэв үүнийг засаг баригчид шийдэж, нэг талд гарган асуудлыг шийдвэрлэхгүй бол Ардын нам ирэх жилийн сонгуульд өвдөг шороодох энүүхэнд. Х. Нямбаатарт өвдөг шороодох эрх байхгүй.
Энэ асуудлыг шийдээд гэм зэмийг үүрүүлж, улсыг хохиролгүй болговол Х. Нямбаатар туг тойрч дэвнэ. Эс тэгвэл шороотой өвдөг тохойтой, түүхийн өмнө , сонгогчийн нулимууртай үлдэх бодит хүлээгдэлтэй. Тиймээс Х. Нямбаатар сайдын юуны өмнө хийх ажил бол энэхүү нүүрсний дөчин их наядын хулгайн асуудлыг нэг мөр цэгцлэн цэг тавих. Олон түмэн өдөр бүр харж байна. Шударга бусын, хулгайн энэ “нянг” үтэр түргэн устган илаар болгохыг Монголын ард түмэн өдөр бүрэн харан хүлээсээр, хүлээн харсаар.
З.БАЯРАА
Amlalt.mn
