Монголын нийслэл могой шургах зайгүй түгжрээнд байна. Ард иргэд нь зам дээрээ, машиндаа өнжиж байна. Нийслэлийн бүхий л орон зай усанд автсан. Дээшээ тэнгэр хол, доошоо хатуу гэгч болж байна.
Улс орныг хэн удирдаж байна, ямархуу чансаатай улс гэдгийг шалгах төвөггүй гэлцэх. Таван өдрийн бороо бүрмөсөн шалгаж байна. Энэ шалгалтад улсаараа унаж байна, ялангуяа асуудлыг шийдэх, ажлыг хийх ёстой эрхтнүүд. Цахим сүлжээ, нийтийн мэдээллийг харвал үгээ барж, үсээ үгтээж байгааг бүгд хараастай. Соёл тогтсон, улсын чанар тогтсон газар энэ тохиолдолд хариуцлага үүрч огцрох, хэн ийм байдалд оруулсан бэ гэдэгт хүмүүс эхний саналаараа ажлаа өгдөг.
Монголын төрд үүрлэн, өндөр дээд албан тушаал хашигсад мөн олон байна. Давхар дээлтэй, эрх мэдлийн сэнтий дүүрэн хүмүүс байгаа. Энэ өдрүүдэд тэднээс хэн нэгэн нь улс орноо, нийслэлээ ийм болгосонд харамсан, хариуцлага үүрэн ажлаа өгөх хүн байх нь уу , харцгаая л даа. Японд бол энэ тохиолдолд маш олон хүний ажлын хариуцлага яригдаж, тэр мөрт ёс зүй үүрч, ажлаа өгдөг.
Тийм учраас тэр улс орон тэгж хөгжиж чадсан. Барилгын сайд Ц.Даваасүрэн энэ ухамсраар хамгийн түрүүнд хариуцлага хүлээмээр байна. Би сайд байгаагүй, би хот хариуцаж байгаагүй гэлгүй, зүгээр л энэ салбарыг хариуцсаны хувьд үг дуугүй ажлаа өгч байна гээд мэдэгдэж байх учиртай.
Түгжрэлийн сайд Ж.Сүхбаатар мөн адил. Энэ салбарыг үүрсний хувьд буруутай гээд мэдэгдэж байх ёстой.
Эрүүл мэндийн сайд С.Чинзориг ялгаагүй. Өтгөн шингэнтэй бохир усаар иргэдээ эрсдэлд оруулсан надад энэ сандал дээр суух ёс зүй алга гээд мэдэгдэж байх ёстой.
Батлангийн Г.Сайханбаяр энэ нийслэлээ цэрэг армиараа хамгаалах л ёстой. Энэ сэртээгүй байсандаа уучлал гуйх ёстой.
Хотын дарга Д.Сумъяабазар хариуцлага үүрэх асуудалд хамгийн түрүүнд ярих учиртай. Мэхийн зогсоод уучлал эрэх ёс зүйгээр хариуцлагыг чимэн, иргэдийнхээ бухимдлыг нимгэлж байх нь дэлхийд тогтсон соёл.
Сангийн сайд Б.Жавхлан ч, нийслэлээ өчнөөн эрсдэлд орууллаа, хяналт тавьж чадсангүй, өчнөөн төчнөөн санхүүгийн алдагдлыг үүрүүллээ гээд эдийн засаг хариуцсан сайд Ч.Хүрэлбаатартайгаа зэрэгцэн зогсоод, улс орноосоо, ард түмнээсээ уучлал гуйж байх ёстой.
Түлш, эрчим хүчний сайд Б.Чойжилсүрэн хот дүүрэн барилга барьж, тэр нь энэ нийслэлийг ингэж ширэнгэжүүлж, түгжрэл, бухимдлын уурхай болгосонд алга хавсран уучлал эрээд, ажлаа өгч байх ёстой.
Зам тээврийн сайд С.Бямбацогт мөн адил. Зам тээврийн энэ их асуудал, эвдрэл гэмтэл, түгжрэлийн асуудлаас үүдээд ард түмнээс уучлал эрж байх ёстой.
Гадаад харилцааны сайд Б.Батцэцэг адилхан асуудал үүрэх ёстой. Хэдхэн хоногийн дараа хөрөнгө оруулалтын том чуулган Монголд болох гэж байдаг. Гадна дотны олон хүн ирэх гэж байхад, улс орны нийслэлийг ийм нүүр царайтай байлгаж байгаагаараа уучлал гуйх л ёстой. Мөн хэдэн өдрийн дараа улсын наадам болох гэж байна. Наадмын бэлтгэл ямар байгаа нь ойлгомжтой.
Морь уралдах зам харгуй, эрсдэлгүй байдлаас авхуулаад өчнөөн асуудал цалгардаж байгаа. Ч.Номин, Б.Бат-Эрдэнэ энэ бүх асуудлын өмнөөс уучлал гуйж байх ёстой юм. Эрсдэлийг үүсгэхгүйн үүднээс, наанадаж асуудал үүслээ гэхэд хэлж ярьж байсаан гэх үгтэй байх ёстой юм.
Уул уурхайн сайд Ж.Ганбаатар, Хөдөө аж ахуйн сайд Х.Болорчулуун нар Туул голын, ер нь энэ голуудын эрсдэлгүй аюулгүй байдалд эрт л үнэлгээ хийх хариуцлагатнуудын хувьд мөн уучлал эрж, хариуцлага үүрч байх ёстой юм.
Энэ мэтээр эдгээр олон эрх мэдэлтүүдийн хэн нь ч хариуцлага үүрч, ард түмний төлөө зүтгэх үүргийг эс ухамсарласандаа, эрхийг авсан шигээ ажлаа өгч байх ёстой. Яагаад гэвэл чаддаг нь, ийм байдалд оруулдаггүй хүмүүс нь ажлаа хийж байх нь төр улс гэж байгаагийн илэрхийлэл шүү дээ.
Нийгмээрээ харцгаая, нэг албан тушаалтан хариуцлага хүлээх нь үү, яах нь вэ гэдгийг. Нийслэлээ ийм болгочихсоны улмаас нэг сайд огцрох хоншоор байна уу. Улсаараа ул боллоо, ийм болгосон улс төрчид хэрхэн хариуцлага хүлээхийг хамтдаа харцгаая...
Б. БАЯР
Amlalt.mn
