Нүүрсний хулгай нэг өдөр УИХ-ын танхимд нүүгэлтсэн хар утаа шиг ороод ирсэн зүйл биш. 10 гаруй жил яригдсан энэ асуудлыг АТГ-аас 2022 оны идэр ес тачигнаж байхад УИХ-д оруулж ирсэн.
Эхлээд нүүрсний хулгайн хэрэгт холбогдолтой 17 хүний нэрийг зарласан. Тэр нь Экс Ерөнхийлөгчөөс аваад УИХ-ын гишүүдээр өнгө нэмж, Өмнөговь аймгийн экс Засаг даргаар чимэг хийсэн цоглог “хамт олон” байв.
Тэдний зарим нь нүүрс ямар өнгөтэй байдгийг ч мэдэхгүй, сүүлийн хэдэн жил нүүрсний бараа хараагүй, тийм байхад яасан гэж би нүүрс хулгайлсан байх билээ гээд л мэдэгдэж байсан.
АТГ дээр очиж, ээлж ээлжээр мэдэгдэл хийж, шударга шулуунаа гайхан, “Би холбогдолгүй” гэх зэргээр цаг хожсон. Түүндээ хүрвэл ч жинхэнэ хулгайчийг нь нэрлэнэ шүү гэсэн хүн ч цухалзаж байсан.
Тэгээд хэсэг чимээ тасарч байснаа “Эрдэнэс Тавантолгой” ХК-ий захирал Б.Ганхуягийг баривчилсан. Бүүр эхнэр, эгчтэй нь бас “Эрдэнэс Тавантолгойн” албаны дарга, нүүрс хулгайлахад оролцсон компаний захирлуудтай баривчилж хорьсон.
Нүүрсний хулгайчдыг ордон дотроос, УИХ-ын танхимаас, улс төрийн лидер гэж нэрлэгддэг хүрээлэл дотроос бөөнөөрөө гарч ирнэ гэж харж байсан олон нийтэд Б.Ганхуяг гэдэг этгээд чинь хэргийн эзэн хэнгэргийн дохиур гэж "ойлгуулах" ажилланааг жил гаруйн хугацаанд хийсэн.
УИХ-аас төлөөлөл байхгүй бол арай үнэмшилгүй санагдсан байх. УИХ-ын гишүүн Д.Бат-Эрдэнэ, Т.Аюурсайхан нарыг гишүүнээс нь түдгэлзүүллээ. Н.Наранбаатар гүндүүгүй царайлж, амьдралын үнэнийг ярьж, зовлон тоочоод өрөвдүүлж чадсан учраас “халдашгүй” эрх нь хэвээр үлдэв.
УИХ-ын гишүүн Ж.Мөнхбат тангараг өргөж заларсан суудлаасаа өргөдөл бичиж чөлөөлөгдөв. Нүүрсний хэрэгээр шалгуулж байна гэж дуулдсангүй.
Анх зарлагдсан 17 “нүүрсний хулгайч” бүгдээрээ шахам ганхашгүй шударга, хазайшгүй шулуун хүмүүс болж хувирав. Хууль хяналтынхан нөгөө “Эрдэс Тавантолгой” ХК-ий захирал асан Б.Ганхуягтайгаа тас зууралдахаас өөр юу ч хийсэнгүй бололтой.
Т.Аюурсайхан гишүүн ч “Намайг шоронд хийх юм бол УИХ-д нэг ч хүн үлдэхгүй” гэж хэлээд эртхэн санаа амарсан ч гэх. Б.Ганхуяг ч бас Шүүх хурлаа нээлттэй явуулахыг хүсч, гэм буруугүй мөртлөө бусдын өмнөөс хоригдож байна гэж санал гомдол гаргаж байсан.
Эцэстээ Т.Аюурсайхан, Б.Ганхуяг нарт холбогдох хэргийг шүүн тасаллаа. Ялын хэмжээ хөнгөн байна гэж олон нийт бухимдаж байна. Нүүрсний сонсголд гэрчээр оролцуулахгүй “нууж” байгаад Б.Ганхуягаар том хулгайч авлигачид нь туг тахьчихлаа. Өөрсдөө цэвэрхэн сугарч үлдлээ гэж байна.
Б.Ганхуягийг өмөөрч, зөвтгөж байгаа юм биш. Түүний нэрлэх гээд зарлах гээд байсан хулгайч нар нь хэн бол? Нүүрсний хэргийн нүцгэн үнэн хаана үлдэв?
Нөгөө сүртэй эхэлсэн нүүрсний хулгайн асуудал ингэж хартай, сэжигтэй, эргэлзээтэй байдлаар хаалгаа хааж байгаа юм биш биз ээ.
Жинхэнэ том хулгайч нар, улс төрчид, эрх мэдэлтнүүд жишимгүй царайлаад үлдэж байгаа юм биш байгаа. Кинон дээр ч гэсэн “Наадах чинь биш ээ, цаад эзнийг нь барь” гэдэг шүү.
Т.Санаа
амлалт.мн
