Гишүүн Ш.Адьшааг магтсан юм шиг агуулгатай, цаагуураа илтэд доромжилсон, нийгэмд муухай харагдуулахыг зорьсон нийтлэл “Өдрийн сонин”-д нийтлэгджээ.
Үүнийг мэргэжлийн хэвлэл мэдээллийн байгууллага атлаа ямар ч шүүлтүүргүй нийтэлсэнд тэрээр залруулга гаргахыг хүсжээ. Зарчмын зөв асуудал. Уг нийтлэлд, суут улс төрийн замналтай, гүйдэг хүн, далай ламд зочилсон, Ерөнхийлөгч ч хийсэн чадах хүн зэргээр мэргэжлийн сэтгүүл зүйд баймгүй хачин зүйлсийг нийтэлсэн тул УИХ-ын гишүүн Ш.Адьшаагийн ийнхүү хандахыг буруутгах боломжгүй.
Сонгууль дөхөж заваан заваан улс төр эхэлж байна. Ш.Адьшаа, Ховдод Б.Пүрэвдорж, С.Бямбацогт нарын өрсөлдөгчидтэй. Одоо Увсын гишүүд, Говь-Алтайд горилогсод, Завханы гишүүд гээд маш олон өрсөлдөгчидтэй болсон. Эднээс нь ийм сонин зүйл сонинд гаргаж байгааг тааж ядах юмгүй л дээ.
Ш.Адьшаа гишүүн Ховд аймаг дахь Хөшөөтийн уурхайн олон зохисгүй асуудлаар өнөөдөр сонсгол хийх юм билээ. Энэ сонсголыг угтуулан Ш.Адьшааг ийнхүү зүйл бүрээр гутаан доромжлох ажил явагдаж байгааг тэрбээр хэвлэлд ярьжээ. Энэ үнэн байх.
Сайд С.Бямбацогт Хөшөөтийн ордыг стратегийн орд болгох тухай бас яриад байсан. Хөшөөтөөс үүдсэн л асуудал энэ мэт янз янзын улс төрийн сэдлүүдийг үүсгэж байгаа шиг байна.
Ховдод өнөөдөр болох сонсголоос сонин сонин мэдээлэл дуулах талтай юм даа. Ш.Адьшаа гишүүн Хөшөөтийн уурхайг ашиглагч “Мо Эн Ко” компанийн амласан ч хэрэгжээгүй станц болоод коксжуулах үйлдвэр барих зэрэг аймагтай хийсэн гэрээний заалтаа биелүүлээгүй зэргээс хариуцлага нэхэн сонсголд дуудаж, Ховдчуудын эрх ашгийг хангаж ажиллаж байгаа нь төрийн түшээгийн үүрэг мөн.
Тиймээс Ширнэнбаньдын Адьшаа гишүүний сонсголд амжилт хүсэх хэрэгтэй, Ховдчууд!
Б.ДОРНО
Amlalt.mn
