ЖДҮ-ийн санхүүжилтийн “Cashme-Нийлүүлэлтийн сүлжээний платформ”-ын нээлт Новотел зочид буудалд өнөөдөр боллоо. Энэхүү сүлжээний платформ Монголд анх удаа хэрэгжих гэж байгаа учир сүлжээний платформын дэлгэрэнгүйг Монгол, Хятадын талаас танилцуулав.
Дэлхийн банкны бүлгийн гишүүн байгууллага болох Олон улсын санхүүгийн корпорациас Монголын банкны холбоотой байгуулсан хамтын ажиллагааны гэрээний хүрээнд Монгол Улсад Нийлүүлэлтийн сүлжээний санхүүжилтийн зах зээлийг хөгжүүлэхээр хэдэн жилийн өмнөөс төлөвлөсөн байна.
Энэ үеэр “Cashme-Нийлүүлэлтийн сүлжээний платформ”-ыг хамтран зохион байгуулж буй Digital credit ухаалаг санхүүгийн шийдлийн компанийг үүсгэн байгуулагч, гүйцэтгэх захирал Д.Болор-Эрдэнээс тодрууллаа.
-“Cashme-Нийлүүлэлтийн сүлжээний платформ”-ын ач холбогдлын талаар хэлж өгнө үү?
-Cashme-Нийлүүлэлтийн сүлжээний платформ гэдэг ойлголт дэлхий нийтэд маш их түгсэн. Сүүлийн үеийн хамгийн ололттой зээлийн платформ юм. Энэ бол зээл биш юм. Өөрөөр хэлбэл, бизнес хийж байгаа хүмүүс ямар нэгэн барьцаа хөрөнгө шаардлагагүйгээр санхүүжилт авах боломжтой платформ. Дижитал кредит компани, Монголын Банкны холбоо, Олон улсын санхүүгийн корпорацтай хамтарч Монголын зах зээлд нийлүүлэхээр нээж байна.
Жишээ нь, Сүү ХК-д өглөө бүр сүүгээ нийлүүлдэг фермер байя гэж төсөөлье. Өдөрт 100 литр сүү саагаад Сүү ХК-д нийлүүлдэг. Энэ төлбөр 3-7,14 хоногийн дараа фермерт орж ирдэг. Энэ хугацаанд фермерт мөнгө хэрэгцээтэй байдаг учраас банкнаас мөнгө зээлдэг. Тиймээс энэ мөнгөний хүлээлтийн асуудлыг Нийлүүлэлтийн сүлжээний платформ шийдэж байна. Та сүүгээ аль нэгэн компанид нийлүүллээ. Нийлүүлсэн сүүнийхээ мөнгийг тэр даруйдаа онлайнаар авна.
-Барьцаатай зээл үү, мөн хүү бодогдох уу?
-Барьцаа байхгүй. Гэхдээ мэдээж, тодорхой хэмжээний шимтгэлтэй зээл. Энэ нь банкны болон бусад зээлээс хамаагүй бага шимтгэлтэй юм.
Хятадын жижиг, дунд бизнес эрхлэгчдийн 80 хувь нь энэ платформоос эргэлтийн хөрөнгөө санхүүжүүлээд бизнесээ хийж байна. Цаашдаа олон эерэг өөрчлөлтүүдийг гаргана гэж ойлгож болно.
-ЖДҮ-ийн санхүүжилтийн Нийлүүлэлтийн сүлжээний платформын оролцоонд УИХ-ын зарим гишүүд, улс төрчид хамааралтай юу?
-Нийлүүлэлтийн сүлжээний платформын санхүүжилтэнд ямар нэгэн улс төрийн нөлөө бүхий хүмүүс юм уу, тэднээр дамжуулан зээл олгоно гэсэн ойлголт байхгүй. Харин ямар ч банк энэ сүлжээний платформоор жижиг, дунд бизнес эрхлэгчдэд санхүүжилтийг олгох боломж нээлттэй боллоо.
Тодруулж хэлэхэд, энэ бол дундын платформ гэсэн үг. Нэг дор маш олон санхүүгийн байгууллагууд төвлөрч, жижиг, дунд бизнес эрхлэгчид тэндээс сонголтоо хийж, санхүүжилтээ авна.
-Үл хөдлөх хөрөнгө, ямар нэгэн жижиг бизнес байхгүй хүн эндээс зээл авах боломжтой юу. Жишээ нь, бизнесийн санаа, хийх төлөвлөгөө байдаг. Гэтэл зээл авах барьцаагүйгээс шалтгаалан бизнес ажлаа эхэлж чадахгүй тохиолдлууд байдаг шүү дээ?
-Шинээр бизнес хийх гэж байгаа хүн нь платформ дээр авлага, өглөгийн харилцаа үүссэн тохиолдолд хэн ч зээл авах боломжтой. Жишээ нь, би бүтээгдэхүүн сүүгээ нэг компанид нийлүүлсэн тохиолдолд зээл авна. Бизнесийн санаа тодорхой байвал боломж байгаа.
Б.БАЯРМАА
