Үхань хотын Ян лөү усан боомт нь усан зам, төмөр замын тээврийг хослуулсан Хөх мөрний эрэг дагуух хамгийн том олон улсын ачаа тээврийн боомт юм.

Тус боомт нь 12 мянган тонн даацтай хөлөг онгоцны зогсоолтой бөгөөд олон улсын ачаа тээврийн усан онгоц түр зогсож, ачаа буулгаж ачдаг. 700 мянган тонн ачаа барааг нэг дор хүлээн авах хүчин чадалтай аж.

Мөн 50 тонн ачааг нэг дор өргөх хүчин чадалтай бөгөөд усан тээвэр болон газрын тээвэрт ачиж, буулгадаг давуу талтай.

500 мянган ширхэг чингэлэг ачааг нэг дор хүлээн авдаг. 30 сая тонн ачаа тээвэрлэх хүчин чадалтайгаараа хятадын ачаа тээврийн боомтуудаас тэргүүлж байна.

2020 оны 1-р сараас Үхань боомтын чингэлэг нэвтрүүлэх хүчин чадал жилийн 1.6 сая ачаа тээвэрлэж байгаа бөгөөд цаашид 2,4 сая тонн ачаа тээвэрлэхээр төлөвлөжээ.

Тус боомт нь ачаа барааг Хятад дотор 30 шугам, Япон, Өмнөд Солонгос, Орос, Вьетнам, Индонезийг холбосон олон улсад шууд нэвтрэх 5 шугамаар тээвэрлэж байна.

"Чэгү нэрэмжит" хөлөг онгоц 650 цахилгаан машиныг тээвэрлэн Европ уруу тээвэрлэжээ.

Олон улсаас авто машины сэлбэг, химийн түүхий эд, үйлдвэрлэлийн түүхий эд зэргийг татан авч Хүбэй мужийн аж үйлдвэрийн салбар хөгжихөд гол түлхэц болдог байна.

2024 онд Үхань боомтын төв хэсгийн талбайн 2.3 сая стандарт чингэлэг хадгалан тээвэрлэжээ. Мөн Хятад-Европын 55,000 галт тэрэгт ачаа ачиж буулгажээ. Мөн Олон улсын 106 хөлөг онгоц тус боомтоор дамжин өнгөрчээ.

Жилдээ 1000 гаруй хөлөг онгоц усан замаар ачаа тээвэр хийж байна.

Боомтын үйл ажиллагааг бүхэлдээ камераар хянаж, бас зохицуулалтыг ухаалаг системээр удирддаг байна.

Боомтын хэмжээнд 200 гаруй камер ажиллаж, ачих, буулгах краны үйл ажиллагааны 95 хувийг хяналтын төвөөс удирддаг байна.

Мөн хяналтын төвөөс боомтод ирж буй бүх төрлийн ачааны хяналтын бүртгэлийг цахимаар удирдаж, мэдээллийг хянадаг байна.

Боомт доторх ачааг зөөвөрлөх авто машин нь 100 хувь цахилгаан бөгөөд батарей нь 12 цаг ажиллах хүчин чадалтай юм.

24 цагт тасралтгүй ажиллахад өдөрт 2 удаа батарей сольдог. Батарей солих ажиллагаа бүрэн автомат бөгөөд 5 минутад батарейг сольдог. Ачааны цахилгаан 40 машин боомт дотор ажил гүйцэтгэдэг байна.

Хөх мөрний эдийн засгийн бүс болон "Бүс ба зам" санаачилгын хүрээнд тус боомтын хүчин чадлыг 2035 он хүртэл үе шаттай өргөжүүлэхээр төлөвлөжээ.