Аливаа улс орныг хөгжүүлье гэвэл боловсролын салбараас нь эхлэх ёстой гэсэн үг бий. Манай улсын Боловсролын салбар нэг л “болж өгөхгүй” байгаа нь хөгжлийг “гацааж” буй гол шалтгаан юмуу гэж хэлж болмоор.
Бидний үеийн залуусын хүүхэд байх үед боловсролын салбарт элдэв туршилт, сорилго дунд явсаар өнгөрүүлсэн.
Одоо харин улс орон нэг үеэ бодвол хөрөнгө мөнгөтэй ч болж, боловсролын салбартаа анхаарч эхэлсэн. Харамсалтай нь энэ салбарыг удирдаж байгаа сайд, тэдний багийнханы хуудуутай явдлаас болж эргээд боловсролын салбар уруудахдаа туллаа.
2024 оны сонгуулийн үр дүнд байгуулагдсан Л.Оюун-Эрдэнийн тэргүүлсэн хамтарсан Засгийн газарт УИХ дахь ХҮН намын төлөөлөл болох П.Наранбаярыг Боловсролын сайдаар томилсон. Л.Оюун-Эрдэнийн Засгийн газар огцорсны дараа шинээр томилогдсон Г.Занданшатарын Засгийн газарт хэд хэдэн сайдууд улирч томилогдсоны нэг нь Боловсролын сайд П.Наранбаяр.
Тэгвэл УИХ-ын гишүүн Н.Батсүмбэрэл, Б.Бат-Эрдэнэ, П.Сайнзориг, Д.Бум-Очир, Б.Баярбаатар нар Боловсролын сайд П.Наранбаярыг огцруулах шаардлагыг Ерөнхий сайд Г.Занданшатарт хүргүүлсэн. Залуу гишүүдийн энэ үйлдэл бол алсыг харсан, ирээдүйгээ “өмөөрсөн”, “боловсролыг дээдэлсэн” маш зөв зүйтэй үйл хэрэг гэж олны талархалыг хүлээгээд байна.
Тэд энэхүү шаардлагадаа П.Наранбаяр нь сургуулийн менежментийг сайжруулах дэмжлэг үзүүлэх нэрийн дор 120 сургуульд тус бүр 10 сая төгрөгийг шилжүүлсэн, эргээд 120 сургуулиас дээрх мөнгийг өмнө нь өөрийн ажиллаж байсан, өөрийн хамааралтай байж мэдэх ТББ-руу дээрх шилжүүлүүлсэн, Боловсролын сайдын албан тушаалаа урвуулан ашиглаж, өмнөх Ерөнхий сайд Л.Оюун-Эрдэнийн Засгийн газар огцрохтой зэрэгцэн өөрийн үүсгэн байгуулсан “Шинэ монгол” технологийн Дээд сургуулийг мэргэжлийн Их сургуулийн статустай болгох тушаал гаргасан, ЭЕШ төгсөлтийн шалгалт өгсөн 44 мянган хүүхдийн “хувь заяагаар тоглож, тестийн шалгалтанд Солонгос соёл судлаачийн нэр зэрэг алдаатай, хичээлд заагдаагүй хамааралгүй асуултууд оруулсан, шалгалтын зарим материал задарсан, зарим шалгуулагч дээр оноо нэмсэн, Боловсролын үнэлгээний төвийн даргаар мэргэжлийн бус, өөрийн намын хүнийг томилсон зэрэг асуудлыг хөндөн түүнийг огцруулахыг шаардсан.
УИХ-ын гишүүн П.Наранбаяр нь ХҮН намаас сонгогдсон, УИХ-ын гишүүн Ж.Галбадрах МАН-аас жагсаалтын 9-рт бичигдэн УИХ-ын гишүүн болсоныг харвал энэ хоёр гишүүн өөр өөр намаас сонгогдсон, илтэд ил харагдах ашиг сонирхолын зөрчилгүй мэт боловч үнэн хэрэгтээ Япон улсад сурч төгссөн, Ж.Галбадрахын үүсгэн байгуулж захирлаар нь ажиллаж байсан “Шинэ монгол” сургуулийн захирлаар нь П.Наранбаяр ажиллаж байсан, мөн Ж.Галбадрах "Сургуулийн судалгаа хөгжлийн Шинэ Монгол төв” ТББ-ийн тэргүүнээр ажиллаж сургуулийн менежментийг сайжруулах төслийг хэрэгжүүлж байсан, энэ хоёр хамтран 2015 онд “Монгол дахь мабучи тэтгэлэгийн төгсөгчдийн холбоо” ТТБ-г байгуулж байсан гэдгээр нь ашиг сонирхол нэгтэй гэж хардаж болно.
Тэд Япон улсад суралцахдаа Японы мэдлэг боловсролыг нь биш “залилан мэхэх” аргыг нь сурсан уу гэлтэй. Барин тавин худал ярьж байгаа нь баримтаар нотлогдох хэдий ч “ҮНЭН” гээд зүтгэх.
Ард түмний дуу хоолой болж мэдээлэл хүргэдэг Шилэн Цогоо П.Наранбаяр, Ж.Галбадрах нарын хамтран “ажилладаг” ТББ-ын тухай мэдээлэл, өөрийн хамраал бүхий “Шинэ Монгол” технологийн дээд сургуулийн статусыг мэргэжлийн Их сургуулийн ангиалад хамааруулах тухай тушаал гаргасныг баримттай хүргэсэн бол УИХ-ын гишүүн, Боловсролын сайд асан Л.Энх-Амгалан “ТӨРИЙН АЖЛЫГ "БИ ҮХЭХЭЭР ЧИ ҮХ" ГЭДЭГ ШИГ ОЙРЫН ЗАЙН УЛСТӨР ХИЙЖ БОЛОХГҮЙ” гэсэн пост оруулж, үүндээ Боловсролын сайд П.Наранбаяр “Өмнөх сайдын үед хэрэгжүүлсэн төслийг үргэлжлүүлж 120 сургуульд санхүүжилт шилжүүлсэн нь үнэн” гэж хэлсэн байна лээ.Үнэндээ 2023 оныг "Сургалтын байгууллагын менежментийг дэмжих жил" болгон зарласан ч УИХ-ын гишүүн Ж.Галбадрахын өмчилж, П.Наранбаярын менежмент хийдэг “Шинэ Монгол” сургуулиар менежмент хийлгэх тухай нэг ч тушаал гаргаж, УИХ-ын гишүүн Ж.Галбадрахын эзэмшлийн ТББ руу нэг ч төгрөг шилжүүлж байгаагүй гэдгийг албан ёсоор хариуцлагатайгаар мэдэгдье. Эрүүл ухаантай сайд хүн төрийн мөнгийг хамаарал бүхий ТББ-руу шилжүүлэх тушаал гаргаж шилжүүлчихээд түүнийгээ өмнөх сайдын хийсэн төслийг үргэлжлүүлж байна гэж яаж нүүр улайхгүй хэлж чадаж байна вэ? Намайг ажиллаж байх сүүлийн жилүүдэд Элсэлтийн ерөнхий шалгалттай холбоотой энэ жилийнх шиг гомдол, бодит пакт хэзээ ч гарч байгаагүй. БҮТ-ийн дарга Ганбат гэж мэргэжлийн залууг чөлөөлж, ХҮН намынхаа мэргэжлийн бус төлөөллийг авчирч тавьсны гай нь олон зуун хүүхдүүдийн ирээдүй, урам зоригоор тоглосон үйл явдал болсон гэдгийг хатуу хэлье. Улс төрөө хүүхдүүдээс хол хий, боловсролын салбараас бүр хол очиж хий. Хүүхдүүдийн ирээдүйд, боловсролын шинэчлэлд ХҮН-ийрхүү бүү ханд гэж ХҮН-ий удирдлагуудад болон П.Наранбаярт хандаж хатуу хэлье” гэсэн байна.
Тэгвэл П.Наранбаяр сайдын томилсон Боловсролын үнэлгээний төвийн дарга Г.Гантуяа нь ХҮН намаас УИХ-ын сонгуульд нэр дэвшиж байсан төдийгүй пиар, маркетингийн үйлчилгээ үзүүлдэг “Номадик контент” ХХК-ийг эзэмшдэг бөгөөд тус компаниараа “Засгийн газрын үйл ажиллагааны хөтөлбөрийн зорилтод туссан реформын хүрээнд хэрэгжүүлэх арга хэмжээний талаар оролцогч талуудад мэдлэг мэдээлэл өгч чадавхижуулах” гэх урт нэртэй төсөл хэрэгжүүлэх тендерт шалгарч 790 сая төгрөг авсан байна.
Г.Гантуяа нь П.Наранбаярын сошиал пиарыг ахалж ажилладаг гэх юм билээ. Тиймдээ ч дээрх мөнгийг нэр заасан төсөлд хэрэгжүүлэхээс илүүтэй ХҮН намын, Боловсролын сайд П.Наранбаярын пиар, сошиал, твиттерт “хиамчидад” өгөх зардал болгосон юм биш биз гэсэн хардлага төрж байна.
Сүүлийн үед улаан цайм П.Наранбаярын буруутай, илт худал ярьсан үйлдлийг фэйсбүүк, твиттер орчинд “өмөөрөх” хүмүүс гараад байгаа нь дээр “хиамчид” авахаа аваад “ажлаа хийж байгаа хэрэг үү” гэж бодоход хүргэж байна.
Тиймээс Боловсролын Үнэлгээний төвийн дарга Г.Гантуяагийн эзэмшлийн “Номадик контент” ХХК-тай холбоотой дээрх асуудлыг АТГ-аас нэн даруй шалгах ёстой болов уу?
Шинэ Ерөнхий сайд Г.Занданшатар танд хандан Боловсролын сайд П.Наранбаярыг огцруулах шаардлага хүргүүлсэн УИХ-ын нэр бүхий 5 гишүүний шаардлагатай танилцан эрх мэдлээ урвуулан ашиглаж, өөртөө болон өөрийн хамаарал бүхий этгээдүүдэд улаан цайм давуу байдал олгосон, ЭЕШ-ийг хуудуутай явуулж Монгол ирээдүй болсон хүүхэд залуусын ирээдүйг “харлуулсан”, боловсролын салбарын бодлогыг унагасан сайд П.Наранбаярыг нэн даруй үүрэгт ажлаас чөлөөлөх нь наанадаж Монголын Боловсролын салбарт, цаанадаж улс орны ирээдүйн хөгжилд ихээхэн хувь нэмэртэй үйл хэрэг болно гэдгийг сануулъя.
Хэрэв та энэ асуудлыг үл тоон, П.Наранбаяр сайдын “хулгай, худал, хуудуутай” эвлэрэх юм бол цаашлаад Ерөнхий сайд таны суудлыг ч ганхуулж мэдэх эрсдэлтэй нүүр тулах магадлал үүснэ гэдгийг хэлэх байна.
Цаашлаад УИХ-ын гишүүн, Боловсролын сайд П.Наранбаярыг зөвхөн сайдын албан тушаалаас нь огцруулаад орхих төдий биш түүнийг УИХ-н гишүүн Ж.Галбадрахын хамтаар УИХ-ын гишүүнээс нь эргүүлэн татахын төлөө УИХ-ын нэр бүхий 5 гишүүд ажиллах нь шударга ёсонд нийцэх хэрэг юм.
Ц.Мөнх
Amlalt.mn
