Монгол Улсад хуурамч бараа бүтээгдэхүүн, чанаргүй эм, хүнсний нэмэлт бүтээгдэхүүн, элдэв өвчнийг эдгээх боломжтой хэмээн олон нийтийн сүлжээгээр сурталчилдаг эм, витаминд хяналт тавьдаг, стандартыг нь мөрдүүлдэг газар гэж байна уу.

Магадгүй инфлүүсэр нэртэй олны танил, олон зуун дагагчтай хүмүүсийн сурталчилснаар эдгээр эм, витамин, эрүүл мэндийн бүтээгдэхүүн нэртэй “ХОР”-ыг авч хэрэглээд гоо сайхан, эрүүл мэнд, амь насаараа хохирох бол хэн хариуцлагыг нь хүлээх вэ?

Өмнө нь олны танил жүжигчид орон сууц барьдаг компаниудтай хамтран ажиллаж, сурталчилгаанд нь оролцон “иргэдэд байр орон сууц авахыг уриалж, бид тантай хөрш болно, бид бас захиалсан” хэмээн сурталчилснаас болж олон иргэд тэдэнд итгэж байр захиалж мөнгө төгрөгөө өгчихөөд өнөөдөр хүртэл 3-5 жил мөнгө ч үгүй, байр ч үгүй хохирчихсон яваа жишээ бий.

Тэгвэл сүүлийн үед фейсбүүкээр “энэ эмийг, ууснаар, тэр наалтыг нааснаар, эл тосыг түрхсэнээр өвчнийг эдгээнэ, таныг тураана, арьсыг чангална, цайруулна, гоо сайхан болгоно, тэр бүү хэл “чалх сайжруулна” гэх мэтээр элдэв эм, эмийн бүтээгдэхүүн, тос, хүнсний нэмэлт бүтээгдэхүүн, витаминуудыг олны танил, олон зуун дагагчтай хүмүүс сурталчлан өндөр үнээр борлуулах” боллоо.

Мэдээжийн хэрэг тус бүтээгдэхүүнийг гадаадаас оруулж ирж байгаа компани ашиг орлогоо бодож, олны танил хүмүүсээр сурталчлуулах нь зүйн хэрэг ч сурталчилгаанд нь оролцож байгаа инфлүүсэрүүд, олны танил хүмүүс та бүхэн тухайн бүтээгдэхүүнийг сурталчлахдаа БОЛГООМЖТОЙ хандах ёстой.

Учир нь иргэд таны ярьж хэлж байгаа сурталчилгаанд тань итгэж тухайн бүтээгдэхүүнийг хэрэглэж байгаа учир дараа нь элдэв асуудал болоход танд хариуцлага ирнэ. Хууль эрх зүйн талаас танд хариуцлага ирэхгүй, та хариуцлага хүлээхгүй, мөнгийг нь аваад сурталчилгааг нь хийж өгсөн гэж бодож байгаа ч магадгүй тухайн бүтээгдэхүүнийг хэрэглээд хохирсон олон арван иргэдийн гомдол, зүхэл, хэл ам танд “ҮЙЛИЙН ҮР” болж, хэзээ нэгэн цагт ирнэ гэдгийг ямагт санах нь зүйтэй болов уу...

Дээр нь “Монгол Улсын үндсэн хуулийн 14.6-д “Монгол Улсын иргэн эрүүл мэндээ хамгаалуулах эрхтэй” гэж заасан үүргээ төр биелүүлж, иргэдийн эрүүл мэндэд хор хохирол учруулж болзошгүй, найрлага чанар нь тодорхойгүй, ямар өвчин эмгэгт уух нь ойлгомжгүй эм, эмийн болон хүнсний нэмэлт бүтээгдэхүүнийг их хэмжээгээр хилээр оруулж ирэхийг хориглох шаардлагатай.

Мөн бусдын эрүүл мэндэд сөрөг нөлөө учруулахуйц болон хуурамч бүтээгдэхүүн зарж борлуулсан бол хуулийн хатуу хариуцлага тооцох, худалдан борлуулах, сурталчлах явцад нь мэргэжлийн хяналтын байгууллагуудаас хяналт тавихгүй бол технологи хөгжсөн өнөө цагт эм нэртэй “хороор” дамжуулан Монголчууд бидний генийг төвшинд нь “устгах” генетикийн болон бактерлогийн “зэвсэг” ч худалдаалагдаж эсвэл эрүүл мэндэд тустай, витамин гэх нэрээр “үнэгүй тараагдаж” байж ч мэдэх болчхоод байна.

Гэснээс Мэргэжлийн хяналтын байгууллагыг манай улс төрчид татан буулгаж, чиг үүргийг нь салбар яамд руу шилжүүлээд 3 жилийн нүүрийг үзэж байгаа ч салбар яамдууд хуучны Мэргэжлийн хяналтын байгууллагын үүргийг биелүүлж чадахгүй, улсынхаа хэмжээнд салбар бүрт тавих хяналт алдагдчихаад байгааг эрхбиш нэг харж байдаг байгаа даа.

Ямартай ч төр нь хяналт тавьж, чанар стандарт мөрдүүлж чадахаа байчихсан энэ нөхцөлд ядаж иргэд та бид сошиал орчинд сурталчлагдаж байгаа “элдэв өвчнийг эмчилнэ, гоо сайхныг тань сайжруулна” гэсэн бүтээгдэхүүн бүрт шууд итгэхгүй ХЭРСҮҮ хандахыг бид уриалж байна.

А.Галт

Amlalt.mn