Сонгуулийн ерөнхий хорооны өнөөдөр (2025.11.12)-ийн хуралдаанаар сонгуулийн үйл ажиллагааг автоматжуулахад тавигдах үндсэн шаардлагыг баталж, сонгуулийн автоматжуулсан системийн техник, технологийн шийдлийн талаар судалгаа хийж, технологийн санал боловсруулах Ажлын хэсэг байгууллаа.

Сонгуулийн ерөнхий хорооны дэргэдэх Мэдээллийн технологийн төв болон Цахим хөгжил, инновац, харилцаа холбооны яам, Тагнуулын ерөнхий газар, Улсын бүртгэлийн ерөнхий газрын холбогдох албан тушаалнуудаас бүрдсэн уг Ажлын хэсэг саналаа 2025 оны 12 дугаар сарын 3-ны өдрийн дотор Сонгуулийн ерөнхий хорооны удирдлагад танилцуулах юм.

Сонгуулийн автоматжуулсан системийн тухай хуулийн 28 дугаар зүйлийн 28.1.1-д зааснаар сонгуулийн үйл ажиллагааг автоматжуулахад тавигдах үндсэн шаардлагыг тодорхойлсон захиалгыг Сонгуулийн ерөнхий хороо баталж, түүнийг үндэслэн сонгуулийн автоматжуулсан системийн техник, технологийн шийдлийн талаар судалгаа хийж, өөрийн орны нөхцөл байдалд нийцүүлсэн технологийн санал боловсруулах үүрэг бүхий ажлын хэсгийг улсын бүртгэлийн асуудал эрхэлсэн төрийн захиргааны байгууллага, харилцаа холбооны асуудал эрхэлсэн төрийн захиргааны төв байгууллага, Тагнуулын ерөнхий газар болон бусад холбогдох байгууллага, аж ахуйн нэгжийн төлөөллийг оролцуулан байгуулдаг.

Сонгуулийн автоматжуулсан системийн тухай хууль хэрэгжиж эхэлснээс хойш Улсын Их Хурал, Ерөнхийлөгч болон Аймаг, нийслэл, сум, дүүргийн иргэдийн Төлөөлөгчдийн Хурлын сонгуульд “New Image Cast” санал тоолох төхөөрөмжийг Улсын Их Хурлын шийдвэрээр хэрэглэж байгаа. 2012 оноос хойш хэрэглэж байгаа санал тоолох төхөөрөмж анхны өртгөө бүрэн нөхсөн, шинэчлэх шаардлагатай талаарх дүгнэлтийг холбогдох байгууллагууд 2018, 2022 онд гаргасан. Сонгуулийн автоматжуулсан системийн техник, технологийн шийдлийн талаар судалгаа хийж, өөрийн орны нөхцөл байдалд нийцүүлсэн технологийн санал боловсруулах үүрэг бүхий ажлын хэсгийн дүгнэснээр гурван мянган санал тоолох төхөөрөмж шаардлагатай байгаагаас 2023 онд 507 төхөөрөмжөөр нөхөн бүрдүүлэлт хийсэн юм. Монгол Улсын Ерөнхийлөгчийн 2027 оны ээлжит сонгуулиас өмнө санал тоолох төхөөрөмжийн нөхөн бүрдүүлэлтийг бүрэн хийх шаардлагатай талаар холбогдох баримтыг Сонгуулийн ерөнхий хороо холбогдох яам, Улсын Их Хуралд хүргүүлээд байна.

Эх сурвалж: m-election.mn