Хүний эрхийн Үндэсний Комисс, Төрийн албаны зөвлөл, Монгол Улсын Ёс зүйн хороо, Удирдлагын академи хамтран “Ёс зүй, хүний эрх” сэдэвт хэлэлцүүлгийг өнөөдөр (2025.12.06) зохион байгууллаа.

Хэлэлцүүлгийг нээж ХЭҮК-ын гишүүн Ж.Хунан хүний эрхийн зөрчил, тэр дундаа хөдөлмөрлөх эрхтэй холбоотой гомдлын тоо статистик өндөр байгааг онцлон, төрийн албан хаагчид хөдөлмөрийн харилцаанд ялгаварлан гадуурхалтгүй, дарамт шахалтгүйгээр ажиллаж хөдөлмөрлөх эрх хангагдах ёстойг тэмдэглэв. Тэрээр “Төрийн үйлчилгээний чанар иргэдийн төрд итгэх итгэлтэй шууд холбоотой. Тиймээс төрийн албан хаагчид хүний эрх, жендэрийн мэдрэмжтэй, ёс зүйд суурилсан төрийн үйлчилгээг хүргэх нь нэн чухал” хэмээн тодотгож, бүх шатны төрийн албан хаагчдын хүний эрхийн мэдлэгийг нэмэгдүүлэх, хүний эрхэд суурилсан төрийн албыг бэхжүүлэх чиглэлээр үе шаттай ажлуудыг зохион байгуулж буйг дурдлаа.

ХЭҮК-ын гишүүн Х.Мөнхзул “Ажлын байрны бэлгийн дарамтыг хориглох нь” сэдвээр илтгэл танилцуулж, ажлын байран дахь бэлгийн дарамтын мэдлэг, хандлага, зан үйлийн судалгаанд хамрагдсан төрийн албан хаагчдын дөрвөн хүн тутмын нэг нь ажлын байрны бэлгийн дарамтад өртсөн, зургаан хүн тутмын нэг нь ажлын байрны бэлгийн дарамтыг хориглосон хууль тогтоомжийн мэдлэг, мэдээлэлгүй байсныг онцлов.

Хэлэлцүүлгийн үеэр ХЭҮК-ын гишүүн С.Дондов байгууллагын удирдлага болон албан хаагчид шинээр батлагдаж буй хууль эрх зүйн зохицуулалттай тогтмол танилцаж, үйл ажиллагаандаа мөрдлөг болгон ажиллах шаардлагатайг илэрхийлсэн. Тэрээр “Төрийн байгууллага болон албан тушаалтнууд хүний эрх хамгаалагчийн үйл ажиллагааг хамгаалах зохицуулалтыг дотоод журамдаа тусгаж, сургалт зохион байгуулах үүрэгтэй бөгөөд энэ нь албан тушаалтан , ажилтан АББД болон хөдөлмөрийн харилцаанд үүсэж болзошгүй хүний эрхийн зөрчлийг нээлттэй мэдээлэх, урьдчилан сэргийлэх, түүнийг арилгах боломжийг нэмэгдүүлдэг. Мөн ёс зүйн зөрчлийг шударга шүүмжлэлтэй андуурах хандлага байгааг анхааруулж, энэ хоёр ойлголтын ялгааг зөв ойлгох шаардлагатай” гэдгийг хэллээ.

Хэлэлцүүлэгт УИХ-аас томилогддог байгууллагын удирдлагууд, Төрийн албаны зөвлөлийн гишүүд, яамдын төрийн нарийн бичгийн дарга нар, агентлагийн дарга нар, аймаг, нийслэлийн ЗДТГ-ын дарга нар оролцож, ажлын байрны дарамт, хүчирхийлэл, ажлын байрны бэлгийн дарамтаас урьдчилан сэргийлэх, албан хаагчдын хөдөлмөрлөх эрхийг хамгаалах, байгууллагын хүний эрхийг соёлыг төлөвшүүлэх болон Комисст хүний эрхийн асуудлаар өргөдөл, гомдол гаргах журам, гомдлыг шалган шийдвэрлэх ажиллагааны талаар асуулт тавьж, санал солилцов.

Эх сурвалж: nhrcm.gov.mn