УИХ-ын дарга Н.Учрал “Чөлөөлье” санаачилгын хүрээнд байгуулсан ажлын хэсгүүдийн ахлагч, дэд ахлагч нартай энэ сарын 6-нд уулзаж, ажлын хэсгүүдийн үйл ажиллагааны талаарх явцын мэдээллийг сонслоо.
Тэрбээр хүний эрх, эрх чөлөөг хязгаарлаж болзошгүй хууль тогтоомж, захиргааны хэм хэмжээний актуудыг тодорхойлж, авлига, хүнд суртал үүсгэж, хуулиас давсан дүрэм журамд дүн шинжилгээ хийж, засаж сайжруулах чиглэлд хууль тогтоомжийн төсөл боловсруулах ажлыг цаг алдалгүй, шуурхай хийх шаардлагатайг онцлов.
ХЭҮК-оос Монгол Улс дахь хүний эрх, эрх чөлөөний байдлын талаарх нийт 24 илтгэлийг УИХ-д танилцуулсан. Үүнээс УИХ-ын 8, Хууль зүйн байнгын хорооны 10 тогтоолыг баталсан. Эдгээр тогтоолд тусгасан санал зөвлөмжийг анхаарч, хууль тогтоомжийн төсөлд тусгаж ажиллахыг анхаарууллаа.
УИХ-ын дарга, УИХ болон Засгийн газрын гишүүдийн хамт зүүн, хангайн бүсийн аймгуудаар ажиллаж, иргэд, олон нийтийн санал хүсэлтийг нээлттэй сонсож, санал солилцох хүрээнд нийтлэг асуудлыг онцолж байгааг анхаарч ажиллахыг хүсэв. Үүнд,
-Төрийн албан хаагчдын цалин хөлстэй холбоотой шийдвэр хэрэгжихгүй байгаа, цалин хөлсийг ялгавартай тогтоодог, цомхотгол нь төрийн байгууллага чиг үүргээ хэрэгжүүлэхэд хүндрэл учруулдаг, ажиллах нөхцөлийг сайжруулах хэрэгтэй гэх зэрэг хүсэлтэд анхаарах шаардлагатай байгааг анхаарч ажиллахыг хүслээ.
-Ахмад настны тэтгэвэр, нийгмийн халамжийг нэмэгдүүлэх талаарх иргэдийн саналыг уламжиллаа.
-Улсын төсвийн хөрөнгө оруулалтаар хэрэгжүүлэх шаардлагатай төсөл хөтөлбөр, газар олгох эрхийг орон нутагт шилжүүлэхэд анхаарах иргэдийн саналыг танилцуулав.
-Ашигт малтмалын нөөц ашигласны төлбөрийн орлогоос нөлөөлөлд өртөж байгаа аймаг, сумдад илүү хуваарилахтай холбоотой саналыг онцлов.
-Малчны тухай хуулийн хэрэгжилтийг хангуулж, өрхийн амьжиргааг дэмжих, хөдөө аж ахуйн гаралтай түүхий эдийн экспортыг хориглож, хязгаарлахгүй байхыг анхааруулав.
-Хөгжлийн бэрхшээлтэй иргэдийн нийгмийн харилцаанд оролцох тэгш эрхийг хангах, ажиллаж амьдрах орчин нөхцөлийг сайжруулахад анхаарлаа хандуулж ажиллахыг чиглэл болгов.
-Аж ахуйн нэгжийн орлогын албан татварын тухай хуулийн 22.5.1-д заасан “нийслэл Улаанбаатар хотоос 500 км-ээс хол алсдлагдсан байх” шалгуурыг багасгаж, орон нутагт үйл ажиллагаа явуулж байгаа хуулийн этгээдэд орлогын албан татварын хөнгөлөлт үзүүлэх зэрэг нийтлэг асуудлыг анхаарч ажиллахыг хүслээ.
