"Цагаан алт" үндэсний хөдөлгөөний хүрээнд салбарын хүний нөөцийг бэлтгэх, чадавхжуулах талаар Монгол Улсын Их Хурлын 2024 оны 06 дугаар сарын 05-ны өдрийн 63 дугаар тогтоолд тодорхой тусгасан байдаг билээ.

"Малын гаралтай түүхий эдийг боловсруулах үйлдвэрлэлийг дэмжих зарим арга хэмжээний тухай" тус тогтоолд салбарын хүний нөөцийг бэлтгэх, чадавхжуулах чиглэлээр:
• Үндэсний ажил, мэргэжлийн ангилал, тодорхойлолт болон сургалтын хөтөлбөрийг мэргэжлийн холбоодтой хамтран шинэчлэх;
• Гадаадын өндөр хөгжилтэй оронд инженер, техникийн ажилтан бэлтгэхэд дэмжлэг үзүүлж, "Ерөнхийлөгчийн илгээлт 2100" хөтөлбөрт хамруулах;
• Салбарын хүний нөөцийг коллеж, мэргэжлийн сургалт үйлдвэрлэлийн төвд сургах, нарийн мэргэжлийн ажилтнуудыг дотоод, гадаадын их дээд сургуульд суралцахад дэмжлэг үзүүлэх;
• Улаанбаатараас орон нутгийн хөнгөн үйлдвэрт шилжин суурьших иргэдийг тогвортой ажиллах нөхцөлөөр хангах;
• Үндэсний ажил мэргэжлийн стандарт, цалин хөлсний бодлогыг боловсруулж, хүн төвтэй зохистой хөдөлмөрийн харилцааг төлөвшүүлэх тарифын хэлэлцээр хэрэгжүүлэх талаар тусгасан.

Уг зорилтыг хэрэгжүүлэх чиглэлээр шат дараатай ажлууд хэрэгжүүлж буй бөгөөд энэ удаад "Цагаан алт" үндэсний хөдөлгөөнийг дэмжих нийгмийн хариуцлагын хүрээнд "Зангиа Портал" ХХК-аас санаачлан "Ноос, ноолуур, арьс ширний салбарын хөдөлмөр эрхлэлтийг дэмжих 6 сарын аян"-ыг эхлүүллээ.

Аяны хүрээнд ноос, ноолуур, арьс ширний салбарын ажлын байрны мэдээллийг нийтэд хүргэх, төгсөх ангийн сурагчид болон шинээр ажлын байр хайж буй иргэдэд салбарыг таниулах, хөнгөн үйлдвэрлэлийн талаарх ойлголт, сонирхлыг нэмэгдүүлэх, залуучуудын салбарт оролцоог идэвхжүүлэх, хөдөлмөрийн зах зээл дэх эрэлт, нийлүүлэлтийн уялдааг сайжруулах юм.

"Зангиа Портал" ХХК-аас аяныг үр дүнтэй, өргөн хүрээнд хэрэгжүүлэхэд хамтын ажиллагааны уялдаа холбоог хангах зорилгоор "Цагаан алт" ТББ, Хөдөлмөр, халамж, үйлчилгээний ерөнхий газар, Монголын ноос ноолуурын холбоо, Монголын ноосон бүтээгдэхүүн үйлдвэрлэгчдийн холбоо, Монголын арьс ширний үйлдвэрлэлийн холбоотой Хамтын ажиллагааны санамж бичиг байгууллаа.

Amlalt.mn