Гэр хорооллыг дахин төлөвлөн, Азийн хөгжлийн банк, Уур амьсгалын ногоон санхүүжилтээр нийт 5000 өрхийн ногоон орон сууц бүхий эко хорооллын цогц бүтээн байгуулалтыг Баянхошуунд төлөвлөж буй. Тодруулбал, соёл, боловсрол, худалдаа, үйлчилгээ, дэд бүтэц, орон сууцыг цогцоор нь шийдвэрлэж агаар, хөрс, орчны бохирдлыг бууруулахыг зорьж байна. Уг төсөл Баянхошуу дэд төв болон Шархад дэд төвд 2023-2030 оны хооронд хоёр үе шаттайгаар хэрэгжинэ.

Эхний үе шатанд Баянхошуу дэд төвд 462 айлын орон сууц барихаар төлөвлөж, эхний ээлжийн 110 айлын дөрвөн блок орон сууцыг 100 хувь ашиглалтад оруулж, нийслэлийн Орон сууцны корпорацид хүлээлгэн өгсөн. Харин дараагийн ээлжийн 150 айлын дөрвөн блок барилгын ажил 86 хувьтай, 76 айлын хоёр блок 58 хувьтай, 126 айлын гурван блок орон сууцны ажлын зураг төсөв 90 орчим хувьтай эрчимтэй үргэлжилж байна. Тус орон сууц нь эрчим хүчний хэмнэлттэй ногоон орон сууц гэдгээрээ онцлогтой бөгөөд 37 ам метр хоёр өрөө, 54 ам метр гурван өрөөний сонголттой. Барилгын ухаалаг удирдлагын SCADA системтэй, ашиглалтын зардлыг 20 хувь бууруулах зорилготой, олон улсын ногоон барилгын EDGE гэрчилгээ авсан анхны орон сууц юм. Мөн гурван төрлийн хүлэмжтэй, оршин суугчид хүлэмжээ түрээслээд нарийн ногоо тарих боломжтой. Угаалгын өрөөний угаалтуур болон шүршүүрийн усаа цэвэршүүлээд эргүүлэн суултууртаа хэрэглэдэг. Айл бүр дотроо дулааны тоолууртай, халаалтаа тохируулдаг, ус хэмнэлтийн шийдлүүдтэй, байрнууд нь дээвэр дээрээ нарны зайн хураагууртай.

Төслийн хоёр дахь үе шатанд Шархад дэд төвд 338 айлын 10 блок орон сууц, үйлчилгээний талбайг төлөвлөсөн. Эхний ээлжийн 110 айлын дөрвөн блок орон сууцны барилгын ажил 100 хувь, мөн гадна тохижилтын ажлыг хийж байна. Шархад дэд төвийн нийт гүйцэтгэл 72 хувьтай үргэлжилж байна. Төсөл хэрэгжсэнээр нийгэм, эдийн засгийн хувьд барилга, хөрөнгө оруулалтын салбар дахь төр, хувийн хэвшлийн хамтын ажиллагааг өргөжүүлнэ. Нийгмийн эмзэг бүлэг болон хөгжлийн бэрхшээлтэй иргэдэд тэгш, хүртээмжтэй амьдрах таатай орчныг бүрдүүлнэ. Мөн төрийн үйлчилгээг иргэдэд ойртуулах ач холбогдолтой.

Эх сурвалж: НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС