Сэлэнгэ аймаг “Тэрбум мод” хөдөлгөөний хүрээнд 2030 он хүртэл 20 сая мод тарих амлалтаа давуулан биелүүлж, өнөөдрийн байдлаар 26.2 сая мод тарьжээ.
Тус аймаг хөдөлгөөний хэрэгжилтийн хүрээнд нийт 5000 гаруй га талбайг ойжуулсан байна. Энэ нь ойн санг нэмэгдүүлэх, доройтсон ойг нөхөн сэргээх ажлыг бодит үр дүнтэйгээр хэрэгжүүлж байгааг харуулж байна.
Мөн энэ ажлыг дэмжих зорилгоор 30 сая гаруй тарьц, суулгацын нөөц бүрдүүлсэн нь цаашдын үйл ажиллагааны тогтвортой байдлыг хангах чухал суурь болжээ.
Ойжуулалтын ажлыг зөвхөн мод тарихаар хязгаарлахгүйгээр доройтсон ойг нөхөн сэргээх, хамгаалалтын ойн зурвас байгуулах, авто зам дагуух ногоон зурвас нэмэгдүүлэх, байгалийн тусгай хамгаалалттай бүсийн ойжуулалт зэрэг чиглэлээр цогцоор нь хэрэгжүүлж байна.
Ялангуяа Ерөө, Түшиг, Алтанбулаг зэрэг суманд доройтсон ойг нөхөн сэргээх томоохон ажлууд өрнөж байгаа нь бүс нутгийн экологийн тэнцвэрийг сэргээхэд бодит хувь нэмэр оруулж байна.
Салбарын үнэлгээгээр улсын хэмжээнд тарьсан модны ургалтын дундаж 70-85 хувьтай байдаг бол Сэлэнгэ аймагт мэргэжлийн арчилгаа, хамгаалалт, усалгааг тогтмол хийснээр ургалтын хувь илүү өндөр түвшинд байна.
Цаашид тус аймаг жилд дунджаар 3 сая мод тарих, 1000-1500 га талбайг шинээр ойжуулах, тарьц, суулгацын дотоодын хэрэгцээг бүрэн хангах, ойн нөхөн сэргээлтийн чанарыг сайжруулах зорилт тавин ажиллаж байна.
Сэлэнгэ аймаг нь Монгол Улсын мод үржүүлгийн гол бүс нутгийн нэг бөгөөд “Тэрбум мод” хөдөлгөөний хүрээнд тарьц, суулгац нийлүүлэгч тэргүүлэх аймгаар тодорч байна.
Эх сурвалж: Montsame.mn
