Монголын Үндэсний Худалдаа Аж Үйлдвэрийн Танхим анх удаа үндэсний үйлдвэрлэгчдийн групп бүрдүүлэн Канад улсын Монтреал хотноо 2026 оны 4 дүгээр сарын 29-нөөс 5 дугаар сарын 1-нд зохион байгуулж буй “SIAL Canada” олон улсын үзэсгэлэнд оролцож байна.
Энэхүү үзэсгэлэн нь Хойд Америкийн хүнс, хөдөө аж ахуйн салбарын хамгийн томд тооцогддог бөгөөд дэлхийн 55 орны 800 гаруй аж ахуйн нэгж бүтээгдэхүүнээ танилцуулж, Канад, АНУ болон бусад 78 орны 23,000 гаруй мэргэжлийн шинжээч, хүнс судлаачдыг нэг дор цуглуулдаг Канад дахь хамгийн том үзэсгэлэн ажээ.
“SIAL Canada” нь зөвхөн хүнсний бүтээгдэхүүний танилцуулга худалдаанаас гадна хүнсний үйлчилгээ, боловсруулах үйлдвэрлэлийн салбарынхныг нэгтгэдэг цогц үйл ажиллагаа гэдгээрээ онцлогтой. Үзэсгэлэнгийн үеэр хүнсний шилдэг инновац, шингэн хүнс, шилдэг бяслаг, шинээр тодорч буй старт-ап компаниудын тэмцээн уралдаан болохоос гадна салбарын экспертүүд туршлага хуваалцах, инновацид чиглэсэн хурал зөвлөгөөн болох юм.
Тус үзэсгэлэнд МҮХАҮТ-ын Гүйцэтгэх захирал Ц.Магнайбаатар, Үзэсгэлэн яармагийн газрын ахлах мэргэжилтэн Ц.Хулан нараар ахлуулсан Мон-Тува ХХК, Гантиг Мах ХХК, Амид Ложистик ХХК, Мандала Ай Юу ХХК, Номад Базаар ХХК, Пума Сервис ХХК болон Чингүүнбат ХХК-ийн төлөөлөгчид Канад улсын хөдөө аж ахуй, хүнсний салбарын дэвшилтэт технологийн шийдлүүдтэй танилцаж, бараа бүтээгдэхүүнээ Хойд Америкийн зах зээлд гаргах боломжийг судалж байна гэж МҮХАҮТ мэдээлэв.
Эх сурвалж: Montsame.mn
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!