Европын Холбоо ба Меркосурын хооронд байгуулсан чөлөөт худалдааны хэлэлцээр тавдугаар сарын 1-нд шилжих шөнөөс эхлэн түр үндсэн дээр хүчин төгөлдөр болж байна.
Бразил, Аргентин, Уругвай, Парагвай улсуудын интеграцийн нэгдэл болох Меркосур ба Европын улсуудын хооронд байгуулсан уг гэрээ нь худалдааны саад тотгор ба татваруудыг үе шаттайгаар бууруулах, цуцлах замаар бараа бүтээгдэхүүн, үйлчилгээний солилцоог идэвхжүүлэх зорилготой юм.
“Германы гадаад худалдааны нийт эргэлтийн ердөө 1 орчим хувь нь Өмнөд Америкийн дээрх дөрвөн улсад ногддог боловч уг хэлэлцээр нь Германы компаниудын хувьд багагүй ач холбогдолтой” гэж Худалдаа-аж үйлдвэрийн танхимуудын Холбооны нэгдэл /DIHK/ мэдэгджээ. Санал асуулгын дүнг үзвэл, олон улсын зах зээлд ажилладаг компаниудын 44 хувь нь уг гэрээнээс мэдэгдэхүйц ашиг хүртэнэ гэсэн хүлээлттэй байна хэмээн DIHK-ийн Гадаад худалдааны хэлтсийн захирал Фолькер Трайер ярилаа.
Энэхүү хэлэлцээрийг 25 жил гаруй хугацаанд хэлэлцээ хийсний эцэст энэ оны эхээр байгуулсан юм. Ингэснээр 720 сая хүнтэй том зах зээл нээлттэй болж байгаа бөгөөд гаалийн татвар олон тэрбум еврогоор буурна. Түүнээс гадна энэхүү тохиролцоо нь АНУ-ын Ерөнхийлөгч Д.Трампын протекционист бодлогод өгч буй хариу юм.
Гэхдээ уг гэрээг Европын парламент дэмжсэн тохиолдолд бүрэн хэмжээгээр хэрэгжиж эхэлнэ. Зарим депутатуудын үзэж байгаагаар, гэрээг бүрэн соёрхон батлахын тулд ЕХ-ны гишүүн орнуудын парламентууд зөвшөөрсөн байх ёстой ажээ. Иймээс Европын парламент эрхзүйн дүгнэлт гаргуулахаар уг гэрээг Люксембург дахь ЕХ-ны шүүхэд шилжүүлсэн бөгөөд дүгнэлт гартал хэдэн сарын хугацаа шаардлагатай. Харин Европын комисс шүүхийн шийдвэрийг хүлээлгүйгээр чөлөөт худалдааны механизмыг ажиллуулж эхлэх нь зүйтэй гэж үзсэн байна.
Уг механизмыг хамгийн ихээр шүүмжилж буй Франц, Австри улсуудын болгоомжилж байгаагаар, Меркосуртай байгуулсан гэрээ нь Европын экологийн стандартын шаардлагуудыг сулруулж, Латин Америкийн хямд бүтээгдэхүүн орж ирснээр Европын хөдөө аж ахуйн салбарт таагүй нөхцөл байдлыг үүсгэх ажээ.
Түүнээс гадна Амазоны ойг огтлох үйл ажиллагаа эрчимжинэ гэдгийг байгаль хамгаалах байгууллагууд анхааруулсан байна.
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!