Монголын Морин Спорт, Уяачдын Холбооны Тэргүүлэгчдийн шинэ оны анхдугаар хуралдаан энэ оны нэгдүгээр сарын 13-нд болж, уламжлалт “Дүнжингарав” хаврын уралдааныг сэргээн зохион байгуулахаар болсон. ММСУХ-ны нэрэмжит “Дүнжингарав-2026” хаврын хурдан морины уралдаан өнөөдөр их насны морины уралдаанаар Хүй долоон худаг, Цагаан хөтөлд эхэллээ.
Тус уралдааныг их нас, соёолон, сонгомол дунд насны ангиллаар зохион байгуулах бөгөөд улсын бүсийн зэрэглэлгүй аж. Гурван насны ангилалд түрүүлсэн хурдан морьдыг 20 сая төгрөгөөр байлах бол аман хүзүү 10, айрагдсан хүлгийг 4-8 сая төгрөгөөр шагнана. Мөн 6-10-т орсон хүлгийг 1 сая төгрөгөөр байлахаар болсон байна. Энэ удаа 20-р байр хүртэл мөнгөн шагналаар урамшуулахаар болжээ. Их насны морьдын уралдаанд 64 хурдан хүлэг гарааны зурхайгаас гарчээ. Түрүүлж, айрагдсан морьдыг танилцуулъя.
Түрүү: Төв аймгийн Сэргэлэн сумын харьяат П.Баярбатын хээр. Дорнод аймгийн Сэргэлэн сумын уяач Ж.Энхбатын унаган адуу. 2025 оны “Их хурд” уралдааны айргийн гурав. Б.Мэндсайхан уяж хурдлуулжээ.
Аман хүзүү: Өмнөговь аймгийн Булган сумын уяач Тод манлай уяач Н.Хүрлээгийн хээр. Хязааландаа Хэнтий аймгийн Баян-Адарга сумын бүсэд түрүүлж, соёолондоо улсын наадамд 12-р байрт хурдалсан байна. Энэхүү хүлгийг аймгийн алдарт уяач Б.Ганбаяр уяжээ.
Айргийн гурав: Говь-Алтай аймгийн Шарга сумын уугуул Тод манлай уяач Х.Бат-Эрдэнийн Түмний эх халиун. Тод манлай уяач Б.Бат-Өлзий уяжээ.
Айргийн дөрөв: Хэнтий аймгийн Баянхутаг сумын С.Хүдэрчулууны зээрд. Алдарт уяач Ц.Мөнххуягийн унаган адуу. 2025 оны Зүүн бүсийн соёолонгийн түрүү.
Айргийн тав: Говь-Алтай аймгийн Халиун сумын Б.Эрмүүний халтар халзан. 2025 оны улсын наадамд айрагдсан. Сүхбаатар аймгийн уяач Д.Аюулгүйн унаган адуу. Алдарт уяач Ш.Бадамжунай уяж хурдлуулсан байна.
Эх сурвалж: Montsame.mn
