Лондон хот дахь Sotheby’s ордноос зохион байгуулсан дуудлага худалдаагаар Жайпурын хааны цуглуулгад байсан XVII зууны үеийн одон орны гуулин багаж хэрэгсэл 2 сая фунт стерлингээр (2.75 сая ам.доллар) зарагджээ.

Их Моголын эзэнт гүрний үеийн "зөөврийн одон орны компьютер" хэмээн эрдэмтэд нэрлэдэг энэхүү хэрэгслийн хамгийн сүүлчийн үнэ 2 сая фунт стерлингээс давж, исламын ертөнцийн ижил төрлийн багаж хэрэгслүүдийн дотроос хамгийн өндөр үнэ хүрчээ.

Уг үзмэр нь Жайпурын махаража II Савай Ман Сингхийн цуглуулгад байсан бөгөөд хожим нь түүний гэргий Махарани Гаятри Девид шилжиж, улмаар хувийн цуглуулгад орсон байна. Дуудлага худалдаанд тавихаас өмнө хэзээ ч олон нийтэд дэлгэн үзүүлж байгаагүй аж.

Лахорын сургуулийн хоёр мастерын бүтээсэн энэхүү одон орны гуулин багаж хэрэгсэл нь ийм бүтээлүүдээс хадгалагдан үлдсэн хамгийн том хэмжээний, ховор загварт тооцогддог. Шинжээчдийн хэлж буйгаар, уг багаж нь ойролцоогоор 8 кг жинтэй, 30 см диаметртэй ажээ.

Энэхүү хэрэгслийг цаг хугацаа, зүг чигийг тодорхойлох, одон орны тооцоолол хийх, тэр ч байтугай Мекка руу чиглэсэн зүг чигийг олох зэрэг шашны зорилгоор ашигладаг байжээ. Мэргэжилтнүүд одон орны гуулин багаж хэрэгслийг "Орчлон ертөнцийн хоёр хэмжээст загвар" хэмээн нэрлэж, ажиллагааны нь хувьд орчин үеийн ухаалаг гар утастай зүйрлэж байна.

Төхөөрөмжийн эх бие дээр 94 хотын координат, 38 оддын чиглүүлэгчийг сийлсэн бөгөөд хэмжээсийн тэмдэглэгээг градусын нарийн хуваарилалтаар хийжээ. Энэхүү өвөрмөц нарийн ажиллагаа нь Их Моголын эрин үеийн шинжлэх ухаан, гар урлалын өндөр түвшинд байсныг илтгэж байгаа юм.

Sotheby’s ордноос мэдээлснээр, цуглуулагчид, музейнүүд уг багаж хэрэгслийг ихээхэн сонирхсон байна. Ийнхүү эцсийн үнэ нь 2014 онд Османы эзэнт гүрний үеийн харьцангуй жижиг хэмжээтэй одон орны багаж хэрэгслэл 1 сая орчим фунт стерлингээр зарагдаж байсан өмнөх дээд амжилтыг эвджээ.

Эх сурвалж: Montsame.mn