Олон улсын хөл бөмбөгийн холбооны 77 дугаар их хурал Марокко улсын нийслэл Рабат хотод болно гэж тус холбооны ерөнхийлөгч Жанни Инфантино Канадын Ванкувер хотод болж буй их хурлын үеэр мэдэгджээ.
“ФИФА-гийн зөвлөлийн шийдвэрийн дагуу ээлжит бус их хурал 2026 оны 11 дүгээр сарын 23-нд цахимаар явагдана. Их хурлын үеэр 2031 ба 2035 оны эмэгтэйчүүдийн ДАШТ-ийг аль улсад зохион байгуулахыг шийдвэрлэнэ. Харин 77 дугаар их хурал 2027 оны гуравдугаар сарын 18-нд Рабат хотод явагдана” гэж Инфантино хэллээ.
Үүний сацуу тэрбээр мөн Мароккод болох их хурлын үеэр ФИФА-гийн ерөнхийлөгчийн албан тушаалд дахин нэр дэвшиж өрсөлдөнө гэдгээ мэдэгдсэн байна. “ФИФА-гиийн ерөнхийлөгчийн сонгуулийн үе өнөөдрөөс эхэлж байна. Ирэх онд болох сонгуульд би нэрээ дэвшүүлнэ гэдгээ та бүхэнд хэлэхийг хүсэж байна, энэ бол миний хувьд нэр төрийн хэрэг” гэж Инфантино хэлэв.
Өдгөө 56 настай тэрбээр 2016 оны хоёрдугаар сард болсон ээлжит бус их хурлын үеэр ФИФА-гийн тэргүүнээр сонгогдсон бол 2019 ба 2023 онуудад өрсөлдөгчгүйгээр хоёр удаа улиран сонгогджээ.
Эх сурвалж: Montsame.mn
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!