Улаанбаатар хотноо өнөөдөр хуралдсан Эрдэс баялгийн мэргэжлийн зөвлөлийн өргөтгөсөн хуралдаанаар Эрдэнэтийн-Овооны Оюут ордод 2023-2025 онд гүйцэтгэсэн нарийвчилсан хайгуулын ажлын үр дүнг хэлэлцэж, стратегийн ач холбогдолтой ордод тооцон, нөөцийг албан ёсоор хүлээн авлаа.
Ингэснээр Эрдэнэтийн-Овоо ордыг “бүлэг орд” хэмээн нэрлэх эрх зүйн үндэс бүрдэж, Монгол Улсад хайгуул нь бүрэн хийсэн зэсийн цөөн ордын нэг болж байна.
Оюут ордын нарийвчилсан хайгуулыг эхлүүлэх шийдвэрийг 2023 оны 5 дугаар сарын 2-нд гаргаж, хээрийн ажлыг эхлүүлснээс хойш гурван жилийн дараа үр дүнг тайлагнасан нь онцлох үйл явдал боллоо. Анх батлагдсан геологийн даалгаврын дагуу хээрийн ажлыг 36 сарын хугацаанд гүйцэтгэж, дараа нь зургаан сарын дотор тайлан боловсруулах төлөвлөгөөтэй байсан ч гүйцэтгэгч байгууллага ажлыг төлөвлөснөөс зургаан сарын өмнө амжилттай дуусгажээ.
Судалгааны хүрээнд Оюут уулыг далайн түвшнээс дээш 1408 метрийн өндөрт оршдог бүсэд 930 метрийн гүн хүртэл өрөмдөн шинжилжээ. Үр дүнд нь анх төлөвлөсөн гүнээс хэдэн зуун метрээр илүү гүнд зэсийн хүдэржилт үргэлжилж байгааг тогтоосон нь ордын геологийн боломжийг мэдэгдэхүйц тэлсэн чухал дүгнэлт болсон байна.
Нөөцийн хувьд 1990 онд 42 сая тонн хүдэртэй хэмээн үнэлэгдэж байсан Оюут ордын хэмжээг 200 сая тонн хүргэх зорилт тавьж байсан бол геологичид уг үзүүлэлтийг давуулан биелүүлж, 404 сая тонн хүдэртэй, дунджаар 0.30 хувийн зэсийн агуулгатай, нийт 1.2 сая тонн металл зэсийн нөөцтэй болохыг тогтоожээ. Энэхүү нөөцийн тооцоог Канадын NI 43-101 стандартын дагуу боловсруулж, хөндлөнгийн мэргэшсэн экспертүүдээр хянан баталгаажуулсан байна.
Уг ордыг өмнө нь цаашид судлах шаардлагагүй хэмээн үнэлж байсан боловч дэлхийн зах зээл дэх зэсийн үнийн өсөлт, мөн Эрдэнэтийн үйлдвэрийн дэд бүтцийн давуу талд тулгуурлан эдийн засгийн хувьд ашиглах бүрэн боломжтой нь ийнхүү нотлогдож байна. Нарийвчилсан судалгаагаар Оюут ордын хэмжээнд нийт 55 төрлийн эрдэс, 36 элементийн бүрэлдэхүүнийг тогтоож, гидротермаль хувирлын судалгааг газрын хэвлийн орон зайд 11800 гаруй цэгт тулгуурлан боловсруулсан нь энэ төрлийн судалгаанд шинэ жишиг тогтоож байгааг геологичид онцолжээ.
Түүнчлэн Орхон-Сэлэнгийн бүс нутагт зэс-молибденийн порфирын төрлийн орд илрүүлэх геологи, геофизик, геохими болон структурын шалгуур үзүүлэлтүүд илүү тодорхой болсон байна. Үүний үр дүнд Завсар, Өмнөд Оюут, Цагаанчулуут болон гүний талбайнуудад эрэл, үнэлгээ, урьдчилсан хайгуул хийх боломж бүрдсэнийг онцоллоо.
Энэхүү үр дүн нь Монгол Улсын Засгийн газрын 2024-2028 оны үйл ажиллагааны хөтөлбөрт туссан стратегийн ордуудын хайгуулыг эрчимжүүлэх, нөөцийг тодорхойлох, ашиглалтад бэлтгэх зорилтын хэрэгжилтэд бодит ахиц гарч буйг илтгэж байна гэж “Эрдэнэт үйлдвэр” ТӨҮГ-ын ХМОНХА-аас мэдээллээ.
Эх сурвалж: Montsame.mn
