Гэмт хэргээс урьдчилан сэргийлэх ажлыг судалгаа, шинжлэх ухаанд тулгуурлан шинэ шатанд гаргах зорилготой “Гэмт хэрэг, зөрчлөөс урьдчилан сэргийлэх бодлого, үйл ажиллагаа: Онол, практик” сэдэвт эрдэм шинжилгээний хурал өчигдөр (2026.05.26) боллоо.

Тус хурлыг Гэмт хэргээс урьдчилан сэргийлэх ажлыг зохицуулах зөвлөлийн Ажлын алба, Дотоод хэргийн их сургууль болон Нийслэлийн гэмт хэргээс урьдчилан сэргийлэх ажлыг зохицуулах салбар зөвлөл хамтран зохион байгуулсан юм.

Орчин үеийн нийгмийн харилцаа, технологийн эрчимтэй хөгжлийн нөлөөгөөр гэмт хэрэг, зөрчлийн шинж чанар улам нарийсаж, системийн болон нийлмэл хэлбэрт шилжиж буй энэ үед уламжлалт арга барилаас илүү урьдчилан таамаглах, эрсдлийг эрт илрүүлэх, шуурхай хариу арга хэмжээ авах шинэ бодлогын хэрэгцээ нэмэгдэж байгааг хурлын үеэр онцлов.

Эрдэм шинжилгээний хуралд шүүх эрх мэдлийн байгууллага, хууль сахиулах байгууллага, төрийн болон төрийн бус байгууллагын 120 гаруй эрдэмтэн, судлаач, төлөөлөгч оролцож, 60 гаруй илтгэл ирүүлснээс 10-ыг хэлэлцэж байна. Мөн БНСУ-ын криминологийн салбарын эрдэмтэн, судлаачид туршлага, судалгааны үр дүнгээ танилцуулсан нь онол, практикийг холбосон бодит шийдэл боловсруулах боломжийг бүрдүүлж буйгаараа онцлог юм.

Хурлыг нээж ХЗДХЯ-ны Төрийн нарийн бичгийн дарга Б.Батбямба, Дотоод хэргийн их сургуулийн захирал Т.Сүхболд нар үг хэлэхдээ гэмт хэрэг, зөрчлөөс урьдчилан сэргийлэх ажил нь зөвхөн хууль сахиулах байгууллагын чиг үүрэг бус төр, иргэн, боловсролын байгууллага, эрдэмтэн судлаачдын хамтын ажиллагаанд тулгуурлах ёстойг онцлон тэмдэглэлээ.

Хурлын хүрээнд хууль эрх зүйн шинэчлэл, технологийн инновац, аюулгүй хот төлөвлөлт, сургуулийн орчин дахь хамгаалал, шинжлэх ухаанд суурилсан удирдлагын тогтолцоотой холбоотой хэд хэдэн онцлох санал, зөвлөмжийг дэвшүүлсэн байна. Тухайлбал, хиймэл оюун ухаан болон “Deepfake” технологид суурилсан залилангийн гэмт хэргийг хуульчлах, метаверс орчны аюулгүй байдлыг эрх зүйн хүрээнд зохицуулах, цахим гэмт хэргийг бодит цаг хугацаанд илрүүлэх дэвшилтэт платформ нэвтрүүлэх зэрэг саналд анхаарал хандуулав.

Мөн “Улаанбаатар – Аюулгүй хот 2030” стратегийн хүрээнд хотын аюулгүй байдлын шинэчлэлийг эрчимжүүлэх, сургуулийн орчин дахь үе тэнгийн дээрэлхэлттэй тэмцэх олон улсын туршлагыг нэвтрүүлэх асуудлыг хэлэлцэж байна.

Тус хурлын үр дүнд Монгол Улсын гэмт хэргээс урьдчилан сэргийлэх үндэсний тогтолцоог олон улсын жишигт нийцүүлэн боловсронгуй болгож, хууль сахиулах байгууллагуудын стратеги төлөвлөлтийг сайжруулах онол, практикийн ач холбогдолтой санал, зөвлөмжийг холбогдох байгууллагуудад хүргүүлэхээр төлөвлөөд байна.

Эх сурвалж: НГХУСАЗСЗ