Холливудын алдарт жүжигчин Мэрилин Монрогийн амьдралын сүүлийн саруудад авхуулсан ховор зургууд болон архивын материалууд олон нийтийн хүртээл болсноор, түүний амьдрал, уран бүтээлийг тэс өөр, шинэ өнцгөөс харах боломж бүрдэж байна. Эдгээр баримтууд нь түүнийг зөвхөн дэлгэцийн дур булаам од гэхээсээ илүүтэй хувь хүн, дахин давтагдашгүй соёлын үзэгдэл талаас нь гүнзгийрүүлэн харуулж байгаагаараа онцлогтой.
1962 онд зуурдаар нас барахаасаа өмнөхөн авхуулсан эдгээр гэрэл зургууд нь түүний амьдралын төгсгөлийн үеийн хамгийн үнэ цэнтэй ховор баримтуудын нэг юм. Шинээр дэлгэгдсэн эдгээр материалууд нь Монрогийн өдөр тутмын эгэл амьдрал, ажлын дотоод орчин, зураг авалтын арын албаны нандин мөчүүдийг илүү ойроос тольдох боломжийг олгож, олны анхаарлыг татаж байна.
Мэрилин Монрог 1950–1960-аад оны дэлхийн хамгийн алдартай жүжигчин гэдгээр нь хүн бүр мэдэх ч, тэрээр тухайн үеийн нийгэм, соёлын сэтгэлгээний өөрчлөлт болон алдартнуудын дүр төрхийн талаарх ойлголтод хувьсгал хийсэн нэгэн байв. Тэрээр загвар, кино урлаг, поп соёлд өөрийн гэсэн арилшгүй мөрийг үлдээсэн билээ.
Сонирхолтой нь, Монро карьерынхаа оргил үед өөрийн продакшн компаниа байгуулж байсан бөгөөд энэ нь тухайн үеийн эмэгтэй жүжигчдийн хувьд дэндүү зоримог, ховор алхамд тооцогддог байлаа. Энэхүү түүхэн шийдвэр нь өнөөгийн кино салбар дахь эмэгтэйчүүдийн бие даасан байдал, эрх тэгш байдлын тухай хэлэлцүүлэгт ч тод жишээ болон дурдагдсаар байна. Мөн түүний уран зохиол, яруу найрагт шимтдэг байсан оюунлаг талыг нь олон хүн мэддэггүй. Түүний хувийн номын санд хэдэн зуун шилдэг зохиолууд байсан бөгөөд чөлөөт цагаа үргэлж ном уншиж өнгөрүүлдэг байжээ.
Олон нийтийн энэхүү тасралтгүй сонирхол, хайр хүндэтгэл түүний төрсний 100 жилийн ойг угтан улам бүр оргилдоо хүрч байна. 2026 оны 6 дугаар сарын 1-нд түүний мэндэлсний 100 жилийн түүхэн ой тохиож байгаа бөгөөд үүнтэй холбогдуулан Их Британийн Лондоны Үндэсний хөрөг зургийн галерейд (National Portrait Gallery - NPG) “Marilyn Monroe: A Portrait” нэртэй томоохон хэмжээний шинэ үзэсгэлэнг зохион байгуулахаар төлөвлөжээ.
Уг үзэсгэлэнг куратор Рози Броудли (Rosie Broadley) болон Жоржия Атиенза (Georgia Atienza) нар хамтран бэлтгэж байна. Үзэсгэлэнгийн гол онцлог нь Монрогийн амьдрал, карьерын эргэлтийн үе шатуудыг цаг хугацааны дарааллаар нарийвчлан харуулах бөгөөд түүний хамгийн алдартай хөрөг зургуудаас гадна гэрэл зурагчид, уран бүтээлчдийн өөр өөр өнцгөөс бүтээсэн сонирхолтой харьцуулгуудыг дэлгэх аж. Тухайлбал:
Ев Арнольд (Eve Arnold), Сесил Битон (Cecil Beaton) нарын алдартай гэрэл зурагчдын дуранд буусан ховор агшин, хувирлууд,
Поп-артын хаан Энди Уорхол (Andy Warhol)-ын бүтээсэн дэлхийд алдартай поп дүр төрхүүд,
Мөн түүний хувийн амьдралын нандин хэсгийг харуулсан Санта-Моникад авхуулсан 6 ховор гэрэл зураг анх удаа олны хүртээл болно.
Шинжээчдийн үзэж байгаагаар, Мэрилин Монрогийн тухай яриа өнөөдөр ч хуучираагүй байгаа нь тэрээр зөвхөн өнгөрсөн зууны од байсандаа биш, харин алдар нэр, олон нийтийн хүлээлт, эмэгтэй хүний бие даасан байдал болон хувь хүний дотоод ертөнцийн тухай хэлэлцүүлгийн амьд соёлын дүр төрх хэвээр байгаагийн илрэл юм.
Эх сурвалж: BBC
