Жил бүрийн зун бороо ороход Сэлбэ гол нийслэлийн хамгийн их яригддаг сэдэв болдог. Үер бууж, айлууд усанд автсаны дараа далан, хамгаалалт, голын урсацын тухай ярьж эхэлдэг. Харин бороо татармагц асуудал дахин мартагдана. Үерийн бурууг байгальд тохох амархан ч, үнэндээ энэ нь олон жилийн төлөвлөлтийн алдааны үр дүн биш гэж үү?
Сэлбэ гол бол зөвхөн ус урсдаг суваг биш. Энэ бол Улаанбаатар хотын экологийн чухал хэсэг, үерийн усыг байгалийн жамаар дамжуулдаг гол урсгал. Гэвч сүүлийн жилүүдэд голын эргийг нарийсгаж, хамгаалалтын бүсэд барилга байгууламж барьж, хог хаягдал, шороо асган урсацыг нь боомилсоор ирсэн.
Өвөл, хавар, намар голын талаар бараг хэн ч ярьдаггүй. Харин аадар бороо ороход "яагаад үер болов" гэж гайхдаг.
Үерийн дараа далан өндөрсгөх, бетон хана барих тухай шийдлүүд яригддаг. Гэвч зөвхөн голыг "хаших" нь асуудлыг бүрэн шийдэхгүй. Ус урсах зайг нь багасгасан, хамгаалалтын бүсийг зөрчсөн барилга байгууламж, инженерийн шугам сүлжээний хүчин чадал зэрэг үндсэн шалтгаануудыг шийдвэрлэхгүй бол үер дахин давтагдана.
Жил бүр үерийн улмаас зам эвдэрч, дэд бүтэц сүйдэж, айл өрхүүд хохирол амсдаг. Дараа нь төсвөөс дахин хөрөнгө гаргаж засвар хийдэг. Ингэснээр нэг асуудлыг дахин дахин төсвийн мөнгөөр нөхөж байгаа хэрэг.
Хэрэв урьдчилан сэргийлэх төлөвлөлт, голын хамгаалалтын бүсийн хяналт, ус зайлуулах системээ цаг тухайд нь шинэчилсэн бол энэ хэмжээний хохирол гарахгүй байх боломжтой байлаа.
Х.Э
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!