УИХ-ын гишүүн Б.Пүрэвдорж Ардчилсан намын өнөөгийн нөхцөл байдалтай холбоотойгоор олон нийтэд байр сууриа илэрхийллээ.
Тэрбээр “Үүсгэн байгуулагчаасаа салж, урт хугацаанд үйл ажиллагаа явуулсан намыг л улс төрийн нам гэдэг. МАН үүсгэн байгуулагчдаасаа салж чадсан учраас урт хугацаанд, амжилттай явж байгаа.
Манай АН одоо хүртэл үүсгэн байгуулагчаасаа салж чадахгүй байна. Энэ намыг үүсгэн байгуулсан хүмүүс намаа өөрийн өмч гэж үздэг. Энэ бол үнэхээр хариуцлагагүй зүйл.
Намын гишүүд бид энэ намын ах нарыг Ерөнхийлөгч, Ерөнхий сайд, сайд дарга нар болгох гэж гутлынхаа улыг цоортол явсан. Гэтэл эдгээр хүмүүс өнөөдөр иргэдэд байтугай гишүүд дундаа ч нэр хүндгүй байна. Тэгсэн мөртлөө дахиад албан тушаал горилж, та нар бидний төлөө зүтгэх ёстой гэдэг.
Гишүүд нь цөхрөнгөө барчихаад байна. Тиймээс АН гишүүдээ сонсож, үүсгэн байгуулагчаасаа салж, гишүүдийн нам болох ёстой. Залуучууд нэгдэх ёстой. Үүсгэн байгуулагчдыг хөөж зайлуулах хэрэгтэй. Тэгж байж энэ нам цаашид чадалтай байна” гэлээ.
