Хүмүүст ямар айдас байна вэ! /II хэсэг/
Хүн бүрт айдас байна. Хүн бүрт амьдралаас нь шалтгаалсан айдас байна. Эрх мэдэлгүй болохвий, хүнд юу гэж хэлэх вэ гэсэн айдас, анд нөхдөөсөө айх айдас, ард түмнээсээ, намаасаа айх айдас , яаж амьдрах вэ гэсэн айдас гээд маш олон айдас хүмүүст байна.
У. Хүрэлсүхэд ямар айдас байна вэ!
Ард түмнээсээ айх айдас байна. Ард түмэн намайг хамгаална гэж хэлдэг хүн шүү дээ. Гэтэл өнөөдөр Ард түмэн өлсөх, даарахын , өл залгахын тулд тамираа барж байна. Ерөнхийлөгч Хүрэлсүх ард түмнээсээ айхын учир нь залгамжлагчаараа хэнийг тавьчихав аа гэдэг асуултад хариулах айдас байна. Яагаад гэхээр залгамжлан тодруулсан хүн чинь улс орныг ямар болгож байгааг харж байна уу, улс орон чинь ямар байна вэ гэсэн асуултад хэрхэх учраа олж хариулахаа мэдэхгүй байгаа их том айдас манай Ерөнхийлөгчид хургаж, ойрын хэдэн өдөрт гадаад улсаар айлчилж, түр сэтгэл амар яваа байх. Гэхдээ ганц хоёрхон хоноод ирэхээс хойш, ард түмэндээ хайрлагдахаар байхын тулд олон асуултад хариулах хэрэгтэй болж. Хамгийн түрүүнд нүүрсдийн гэх хэргийг, дөчин их наядын тонуулыг нэг тийш болгож айдсаа гээх явдал асар чухал байна. Жаран тэрбумын хэргийг ярьж жаалсан Ерөнхийлөгч маань өнөөдөр дөчин их наядын асуудлыг шийдэхгүй, хоёр дөчийн ная, наяад оныхноор Засгаа бариулчихаад сэтгэл тайван байхын үндэс үнэндээ алга. Түүний бодит айдас энэ байна.
Л.Оюун-Эрдэнэд ямар айдас байна вэ!
Л.Оюун-Эрдэнэд айх айдас байна. Ардчилсан намын дарга С.Баярцогт болчихвий гэсэн асар том айдас байна. Ах нар араар тавиад “алчихвий” гэсэн айдас байна. Ардчилсан намын дарга хэрвээ С.Баярцогт болчихбол Ардын намын даргад жинхэнээсээ алх, тулах байх болно. Ордны хаалгаар орж амжаагүй явахад нь С.Баярцогт ордны хаалгыг элээгээд, олон олон улс төрийн давааны шалгуурыг хангачихсан байв. Элбэж дэлбэж хамжин С.Баярцогтыг түлхэн “өшиглөсөн” түүх дэргэд ойр дурайж байгаа. С.Баярцогт үүнийг мэднэ. Шүд зууж, таван зуун хоног суугаад, таван улсын хуулиар шигшигдээд гараад ирлээ. Одоо түүнээс өө олж, хог наахад хэцүү болсон. Сөрөг хүчний намын дарга ийм хүн болох нь эрх баригч намын даргад их халгаатай төдийгүй эвлэрэмгүй явдал болон айдас дагуулаад байна. Ардын намын дарга түүнээс биш алдагдалтай төсвөөс, дөчин их наядын тонуулаас ер айхгүй байна. Юун жаран тэрбум.
Г.Занданшатар ямар айдастай байна вэ!
Эрх мэдлээ алдахвий гэдэг айдас байна, энэ эрхэмд. Учир юун гэвээс эдүгээн Ерөнхий сайдтай бид албан тушаалын болоод бусад ямар ч зөрчил байхгүй байгаа гэж Д.Амарбаясгалан мэдэгдэх үеэс Г.Занданшатарт албан тушаалаа алдахвий гэдэс айдас үүссэн юм. Монголын нийгэм өнөөдөр дөчин их наядын нүүрсний хулгайг эрх баригчид хэрхэн шийдэж, шударга ёс тогтоохыг хүлээн анхааралтай харж байна. Уурлаж, бүр асар ихээр хилэгнэж байна. Жаран тэрбумынхныг одуулсан Л.Оюун-Эрдэнээс энэ асуудлыг бүр ч их нэхэх нь дамжиггүй. Жаран тэрбумд тэгж хилэгнэсэн хүн дөчин наядад бүр ер бусын хариуцлага ярих байх гэж хүлээх нь ч гарцаагүй. Тэгтэл мань хүн энэ тэмцлийн төлөө биш, энэ тэмцлээ хийгээгүйнхээ төлөө, эх орноо өвдөг сөхрүүлснийхээ төлөө тэмцэх бус Ерөнхий сайдын ажлаа өгөөд УИХ-ын дарга болохыг хүссэн сэдэл үнэрээ тавьж эхэлсэнээс Г.Занданшатар дарга айдастай болж эхэлсэн. Ийм айдас Г.Занданшатар даргад байна. Өчигдрөөс спикер маань архитай тэмцэх тухай айхтар ярьж эхэллээ. Алба гулгуулан наймаалцах гэсэн нөхөд архи барьж гуйгаад байх магадлалтай л даа.
Д.Амарбаясгалан ямар айдастай байна вэ!
Мөдхөн Генсек хэмээх алтан албан тушаалаа өгөхтэйгээ зэрэгцсэн горь гоморхол, айдас нүүрлэж байгаа. МАН-ын генсек бол сүүлийн хэдэн жилд “хаан” байв. Монголд болж байгаа томилгоо, улс төр нийгмийн ямарваа бүх хөдөлгөөн, УИХ-ын гишүүд, сайд хэн болох, төсөл хөтөлбөр хэрэгжүүлэх эзэн , за ер нь гар нь дүрэгдээгүй, оролцоогүй юм үнэндээ байгаагүй. Энэ гайхамшигт албан тушаалаа Д.Амарбаясгалан өгөхийн хамт нэгэн том айдас түүнд бий болж байна. УИХ-ын гишүүн биш байдаг, генсекээ өгчихдөг, одоо надад юу үлдэв гэж өөрөөсөө асуутал эмзэг нь дэндсэн Засгийн газрын гал тогооны уугиатай ширэм үлджээ гэдэг хариулт түүнд орж иржээ. Хэзээ ч тэсэрч мэднэ. Хэзээ мөдгүй унаж мэдэх Ерөнхий сайд огцорвол түүний Хэрэг эрхлэхийн дарга сайдын алба мөн хамт үгүй болно. Энэ бол Засгийн хэрэг эрхлэхийн даргын шаналан айдас юм. Хажуугаар нь Н.Удаанжаргал, Б.Ганхуяг найз нар нь хар гэрээс дуудагдаад байдаг. Тэд нар нь хамтран тэгэж, ингэж дийлж явлаа Амарбаясгалантайгаа гээд юм ярихвий гэдэг айдас ч дагалдана.
С.Мандуул
