Нямтайширийн Номтойбаярт одоогийн улс төрчдөөс ялгарах үнэт нэг чанар байдаг. Тэр хулгайч биш. Тэр Монгол төр, ард түмний боломжоос хэзээ ч хулгайлаагүй. Хэзээ ч гэдэг үгийг хэзээ ч битгий хэрэглэ гэж үг байдаг. Номтойбаярын тухайтад хэзээ ч хулгай хийхгүй хүн гэж хэлэхэд яллагдахгүй. Мөн түүнд үнэ цэнтэй нэг өв байдаг. Тэр бол эцэг эхийн нь бүтээсэн ариун хөдөлмөр.
Ариун хөдөлмөрөөс бүтсэн үнэ цэн, капиталтай учраас Н.Номтойбаяр улс төрийн тавцанд шударга, томруун, ил тод байсан. Тэр бусад хулгайчтай хамжаагүй учраас түүнийг өнцөгдүүлэн улс төрөөс завсарлуулсан юм. “МАК”-ын Б.Нямтайшир Монголын бусад зарим хөрөнгөтөн шиг бусармагаар хөлжөөгүй. “Хаан”-ы эзэн Ц.Баатарсайхан шиг банктай атлаа мах савлаж заран, нийтийн хоол хийгээгүй. “Голомт”ын эзэн Д.Баясгалан шиг төмөр замын будилаанд оролцоогүй. Б.Нямтайшир бол аж үйлдвэржилтийг л жинхэнэ утгаар нь хийж яваа бизнесмэн. Бизнесийн соёл, ёс зүйтэй. Зөв үлгэртэй, Монголын хөгжлийг “чирж” яваа хүн. Ийм учир аав, хүү хоёр “хулгайч технологичдод” таалагддаггүй. Гэвч зөв байх ямагт зөвддөг.
Н.Номтойбаярын нэгэнтээ УИХ-ын гишүүнээсээ чөлөөлөгдөж шалгуулах өргөдөл бичсэнээр жишээлүүлэн нүүрсний хулгайд холбогдсон УИХ-ын гишүүдийг ард түмэн шахаж байна. Туйлын зөв. Н.Номтойбаяр тэгж өргөдлөө бичүүд шалгуулсан нь үнэн болохоор.
Түүнийг шалгаад аливаа шамшигдуулал байгаагүйг нотолсон шүү дээ. Энэ учир өчигдөр зарлуулсан 17 хүнээс эгнэж зогсоод тайлбар хийсэн тавыг ард түмэн шоолж, бас шалгуулж зөв буруугаа тогтоолгохыг хүчтэй шахах нь ойлгомжтой боллоо.
Ц.Сэргэлэн гэж хүн зүү шидэж байгаа бол зөрүүлээд тэвнэ шиднэ гэжээ. Түүний энэ үг ард түмэн рүү шидэж байгаа жад юм. Хууль хяналтын байгууллага нэрийг нь зарлаад байгаа бол Ц.Элбэгдоржийн адил зангиагаа зүүн, гутлаа тослоод АТГ-д очих учиртай.
Хилийн асуудал хариуцсан даргаар хижээл насанд хүртлээ ажилласан энэ хүн хилдээ хамгийн наанадаж зөв жишиг үлдээгээд, УИХ-д сонгогдсон нь үнэн л юм бол яагаад хил гааль дамнасан хулгайн хэрэг гарсан юм бэ гэж энгийн асуулт байна. Ц.Сэргэлэн энэ мэтэд эхлэн хариулаад ярих хэрэгтэй. Тэгээд дараа нь тэвнээ шидэх хэрэгтэй.
Ц.Анандбазар долдугаар ангиасаа хойш нүүрсэнд гар хүрээгүй гэжээ. Түүний гар “юм болгонд” хүрсэнийг энэ он жилүүд нотолсон. Онгоцны шатахууныг хүртэл ганцаараа шахаж байсаныг улс таслан зогсоож байх шиг байна. Монополь шатахууны бизнесээр хахлаа, энэ хүн. Бага тэнгэрийг хаусаар дүүргэж спикэр голдуу хүмүүст инж бэлэг болгодог гээд шуугиад удлаа. Булганыхан “Анандбазар аа, одоо болио, далд ор” гээд бүгд хашгиралдаж байна. Анандбазар одоо АТГ-ын үүднээс УИХ- руу юу, гудам руу юу гэдгээ эцэслэн тогтоож ард түмэндээ харуулах хэрэгтэй.
Баагаагийн Баттөмөр гэдэг хүн Тавантолгойг хаана байдгийг ч мэддэггүй гэнэ. Шатахууны чинь агуулах дэлбэрч гурвын гурван хүн өөд болсон. Тэрийг бол мэдэж баймаар. Мөн л монголчууддаа бензин шахаж, бензины үйлдвэрлэлийг хөгжүүлэхийн тээг болоод сууж байгаа хүн шүү дээ. Нүүрсний таван толгойг мэддэггүй гэхэд нөгөө ертөнцөд одсон гурвын хүний асуудлаар АТГ-ын өмнө очиж өч. Үүнийг мэд. Өөрт тань УИХ-ын гишүүн байх ёс зүй үнэхээр алга. Ёс зүйн асуудлаараа нээлттэй асуулга явуул, гурван хүн миний эзэмшлийн бизнес талбарт эндчихлээ, би яах вэ гээд. Түүний дараа л “томрох” хэрэгтэй.
Н.Наранбаатар гэж гишүүн хэллээ. Намайг яагаад нүүрсний хулгайчид нэрлэв, бодоод бодоод олохгүй байна гэж байх шиг байна. Нөгөө ертөнцөөс ирсэн хүн шиг ярьж байна. Зүгээр л, очоод шалгуул. Монголын хууль, хяналтын байгууллага мэлмий нь сохроогүй байлгүй дээ, шударга сайд, журмын нөхөр Х.Нямбаатар чинь хуулийн салбарыг толгойлж байна шүү дээ.
Та нарт хэлэх зөвлөгөө байна, сануулга байна. Та нар зүгээр л Нямтайширын Номтойбаяр шиг л бай л даа!. Өргөдлөө өг. Гишүүнээсээ түдгэлз. Шалгуул, хулгайд холбогдоогүй юм бол хууль хяналтын байгууллагаар тогтоолгоод нэрээ цэвэрлээд, ард түмэндээ зөвшөөрөгдөөд эргээд ирцгээ!!!
Б.Баяр
