Хөшгийн хөндийн шинэ бүтээн байгуулалтын ажлыг эрчимжүүлэх зорилготой Монгол Улсын Шадар С.Амарсайханаар ахлуулсан үндэсний хороо өнөөдөр хуралдаж, Төв аймгийн Хөшигийн хөндий дэх Шинэ Зуунмод хот, Эдийн засгийн чөлөөт бүсийн төлөвлөлт, бүтээн байгуулалтын ажлын төлөвлөгөөг баталж, Олон улсын санхүүгийн төвийн тухай хуулийн төсөл, үзэл баримтлалыг боловсруулах ажлын хэсгийг байгуулахаар тогтлоо.
Хуралдааны эхэнд Барилга, хот байгуулалтын сайд Б.Мөнхбаатар тус бүтээн байгуулалтын өнөөгийн нөхцөл байдал болон 2023-2024 онд хийгдэх ажлын төлөвлөгөөний талаар товч танилцуулахдаа уг бүтээн байгуулалттай холбоотой хууль эрх зүй, инженерийн дэд бүтцийн зураг, төмөр зам болон шийдвэрлэгдээгүй газрын асуудлуудыг ирэх онд шийдвэрлэхээр тусгаснаа онцоллоо.
Хөшгийн хөндийд байгуулах “Шинэ Зуунмод” хотын бүтээн байгуулалтыг Орон сууц, олон нийт, худалдаа, үйлчилгээний бүс, Эдийн засгийн чөлөөт бүс, Тээвэр логистикийн төв, Сургалт-Эрдэм шинжилгээ-Үйлдвэрлэлийн цогцолбор, ИНЕГ-ын 600 айлын орон сууцны цогцолбор гэсэн 5 бүс байхаар төлөвлөж буй. Одоогийн байдлаар Инженерийн дэд бүтцийн зураг төслийн ажил 93,3 хувийн гүйцэтгэлтэй байна. 2023-2024 онд бүтээн байгуулалтын эхний ээлжийн ус хангамжийн шугам сүлжээ, мэдээлэл холбоо, цахилгааны дэд станцын барилга, угсралт зэрэг 8 багц ажлыг эхлүүлэхээр төлөвлөсөн билээ.
Шадар сайд С.Амарсайхан тус төслийн бүтээн байгуулалтын ажлын хүрээнд цахилгаан эрчим хүчний ажлыг эрчимжүүлэх, эх үүсвэрийг тасалдуулахгүй байлгах, цаашид сэргээгдэх эрчим хүчээр бааз сууриа хангах тал дээр анхаарч ажиллахыг үндэсний хорооны гишүүдэд даалгалаа.
Мөн Хөшигийн хөндийн бүтээн байгуулалтын асуудал хариуцсан захиргааны бүтэц, орон тоонд Үндэсний хорооны ажлын албыг багтаан байгуулж, холбогдох дүрмийг шинэчлэн батлах, Олон улсын санхүүгийн төвийн тухай хуулийн төсөл, үзэл баримтлалыг боловсруулах ажлын хэсгийг Үндэсний хорооноос байгуулж ажиллахыг Барилга, хот байгуулалтын сайд Б.Мөнхбаатарт, түүнийг үйл ажиллагаандаа хэрэгжүүлж ажиллахыг Хөшигийн хөндийн бүтээн байгуулалтын асуудал хариуцсан Засгийн газрын бүрэн эрхт төлөөлөгч бөгөөд Хөшигийн хөндийн бүтээн байгуулалтын асуудал хариуцсан захиргааны дарга Д.Оюунхоролд тус тус үүрэг болгов.
