НИТХ-ын төлөөлөч Ц.Батцогт өнгөрсөн сарын 31-ны өдрийн /2023.03.31/ НИТХ-ын ээлжит бус хуралдааны үеэр Нийслэлийн Засаг дарга Д.Сумъяабазарыг огцрохыг шаардаж мэдэгдэл хийсэн.
Тодруулбал, тэрбээр “Нийт 15 асуудлыг хэлэлцэхээр товлосон. Ирцийн хувьд 80 орчим хувьтай оролцож байна. Иргэдээс санал аваад сонгогдсон төлөөлөгч нар ач холбогдол өгөөд хуралдаа ирсэн байна. Гэтэл бидний гаргах гэж буй шийдвэрийг гүйцэтгэх албан тушаалтан хаана байна вэ. Нийслэлд ажил хийх дарга байна уу. Д.Сумъяабазар дарга байгаа юм уу, үгүй юм уу. Өөрийг нь сонгосон иргэдийн төлөөлөгч, эрх баригч дээд байгууллагынхаа хуралд суугаад хэн, юу хэлж, ямар шийдвэр гаргахад анхаармаар байх юм. Хэрвээ ажлаа хийж чадахгүй бол өөрчилье л дөө. Ажил хийх сонирхолгүй, хотын иргэдийн төлөө ажилладаггүй, хуралдаа суудаггүй Засаг даргатай хоёр жил боллоо. Хотын дарга өнөөдрийн хуралд суухгүй бол огцруулах бичгийг өргөн барина гэдгийг албан ёсоор мэдэгдэж байна” гэсэн. Тус хуралд Д.Сумъяабазар дарга суугаагүй. Тиймээс Т.Батцогт төлөөлөгч Хотын даргыг огцруулахаар НИТХын төлөөлөгчидтэй уулзаж эхэлжээ. Түүнээс энэ талаар тодруулахад “НИТХ 45 төлөөлөгчтэй. Түүний найм нь АН, гурав нь ХҮН-ыг төлөөлдөг. Тиймээс намынхантайгаа эхлээд уулзаж байна. Дараа нь ХҮН, МАН-ынхантай уулзана.
Хуулиараа 45 төлөөлөгчийн гуравны нэг нь гарын үсэг зурах ёстой. Өөрөөр хэлбэл, 15 гишүүн гарын үсэг зурах ёстой гэсэн үг. Манай намын найман гишүүн, ХҮН-ын гурван гишүүн дэмжвэл 11 төлөөлөгч болно.
Нэмээд МАН-ын төлөөлөгчдөөс гарын үсэг зуруулах гэж үзнэ. Д.Сумъябазарыг огцруулах асуудлаар төлөөлөгчид одоогоор тодорхой байр, сууриа илэрхийлээгүй л байна. Би уулзалт хийгээд дууссаны дараа гарын үсгийг нь авч эхэлнэ” гэв. Нэг талд Т.Батцогт гишүүн ийнхүү ажиллаж буй бол нөгөө талд Д.Сумъяабазарыг албан тушаалаа өөрийн хүсэлтээрээ өгөх гэж байгаа ингэхдээ эрүүл мэндийн шалтгаантай холбож магадгүй гэх яриа ч Хангарди ордонд гарч байна. Ямартай ч тус асуудлаар НИТХ дэх МАН-ынхан ч их бужигнаж эхэлжээ.
