Засгийн газар шүүр ажиллагаагаа идэвхтэй явуулж байна. Ээ дээ, барах уу даа гэсэн эргэлзээ бүхий нийгмийн хүлээлтэд дорвитой хариулт өгч эхэллээ. Энэ нь өчигдөр Засгийн газрын хуралдааны дараа Хэрэг эрхлэхийн Д.Амарбаясгалан Х.Бадамсүрэн, Н.Багабанди нарыг чөлөөлж, өөрсдөө ч чөлөөлөгдөх өргөдлөө өгч байгааг мэдэгдлээ.

Ингэснээр, хуулийн хязгаар давсан, нам төрийн хайр хишгийг үнэмлэхүй хүртсэн олон арван “ах” нар, намын журамт нэрийн дор энд тэнд, төрийн компани, яам тамгад хууль сүвэгчилж, хийдүүлэн шимэгчилсэн олон хүнийг хуулийн дагуу чөлөөлж байгаа давалгааг цэгцтэй эхлүүлж байна. Туршлага, үнэт зүйл гэж байдаг.

Гэхдээ Монголын төрд удсан ах нар, хуучин бууны хугархайнууд хүний хуучин гэдэг үгийн үнэ цэнийг хэтэрхий алдагдуулсан. Түнжингийн Бадамжунайд сайн хүн олон ч, нийгэмд бий болгосон бүтэц систем нь нэн буруу юм. Тийм ч учраас өнөөдөр нэр бүхий сайтуудад Бадамжунайг авчирсан юм чинь Бадамсүрэнг шалгая гээд бичиж эхэлж байна.

Ийм сэтгэл зүй, ийм шахалт нийгэм олон нийтээс улс төрийг баригчдыг, хэвлэл мэдээллийг шахаж байна. Энэ буруугүй. Эрдэнэт үйлдвэрт арван найман онд хийгдсэн гэрээнээс үүдсэн лоосуутай мөнгийг шалгахад Бадамжунай холбогдож байна гэж Х.Нямбаатар хэвлэлд ярьсан. Тэр арван найман он бол Бадамсүрэн Эрдэнэтийг засаглаж байсан цаг.

Иймэрхүү лоосуу, булхай их учраас хуучны ах нар, хуучны нөхөд мөнөөх хүний хуучин дээлийн шинэ гэдэг үгийн учрыг алдагдуулсан. Одоо бол харин хүний шинэ чухал болж байх шиг байна. Наяад оны нам засгийг толгойлж байгаа дарга нар энэ үгийн учрыг шинээр нээх, тунхаглаж эхлэв бололтой. Цаашдаа УИХ-д гурваас дээш сонгогдсон бүх гишүүдийг дахин УИХ-д ер дэвшүүлэх хэрэггүй. Дөчин их наядаар хулгай хийхийг, төрийн өмчийг шамшигдуулахыг, Хөгжлийн банкнаас зээл авахад эд нар л оройлсон.

Монгол орон ардчиллын индексээр огцом ухарч, арваас тавин жилээр хөгжлөөс хоцорч, гадаад дотоод нэр хүнд шалдаа буусанд УИХ-д гурваас дээш сонгогдсон бүх гишүүд буруутай. Тэд ямар ч алтан үг хэлсэн ч одоо тэднийг УИХ-д дахин дэвшүүлэхгүй байх нь Лувсаннамсрайн Оюун-Эрдэнийн их орны өмнө хийх гавъяа байх болно.

Тайлбар ганцхан, өнөөдрийн Монголын бүх уналт тэднээс эхтэй. Мэндсайханы Энхсайхан төмөр замын бодлогыг орос бодлого гэсэн байна лээ. Мухар төмөр зам сонгодог жишээ нь. Ерөнхийлөгч У.Хүрэлсүх, Зам тээврийн сайд С.Бямбацогт нар очиж нээсэн. Одоо тэр төмөр замыг хил давуулах терминаль барьсанаас шинэ нарийн царигтай төмөр зам барих нь илүү хялбар гэж Мэндсайханы Энхсайхан мөн хэлсэн байна лээ.

Ингэж улсаа хорлоод байгаа гишүүд бол тэрхүү гурваас дээш сонгогдсон товаришууд. Энийг юугаар ч үгүйсгэж чадахгүй. Өнөөдөр Засгийн газар Таван Ш ажиллагаа, түүний нэг шүүр ажиллагаа бол тэдгээр гурваас дээш сонгогдсон УИХ-ын гишүүдийн хийсэн үйл лайны ажил. Тэд ийм нүглийг тарьсан. Ямар сайндаа л Ц.Элбэгдорж, Х.Баттулга нарын тарьсан балгийг цэвэрлэх гэж үйлээ үзэж байна гэж Засгийн тэргүүн хэлэх вэ дээ.

Тиймээс УИХ-д гурваас дээш суусан, хөрөнгө мөнгө, эрх мэдлийн бялууралд таргалсан нөхөд энэ цаг мөчөөс дахин УИХ-д орохгүй байх сэтгэл зүйгээ бүрдүүлэх нь өлзийтэй. Эс тэгвэл, маргааш тэднийг их өөрөөр ард түмэн, түүх шүүнэ. Өршөөхгүй. Шүүр ажиллагаа энэ агуулгаар ч үргэлжилэх ёстой. Ажил хийдэггүй ч төрд эрхлэх , төрийн сэнтийгээр далимдуулан олз завшаан хайгчдыг хайр найргүй шүүрдээсэй. Алтанширээгийн газрын тосны үйлдвэрийн төсөл үргэлжилж байгаа.

Өнөөдрийн Ерөнхийлөгчийн эхлүүлсэн буянт үйлс. Гэвч энэ үйлдвэрийн ажил явахаа байсан.

Уул уурхайн сайд Ж.Ганбаатар нь хэзээ ашиглалтад орох вэ гэхээр хорин дөрөв, тав, зургаа, долоо гэдэг он хэлдэг болсон. Сүүлдээ зугтаад, “Эрдэнэс Монгол”-оос асуу гэж байна лээ. “Эрдэнэс Монгол” руу шилжүүлээд Баянголынхоо вант улсад дүүргийн даргынхаа заваан улс төртэй ноцолдохоор шулуудаж.

Монголын сайдууд ийм л байгаа. Уул уурхайн сайд нь ингэж байна шүү дээ. “Роснефть”-ийн уяаны хэрэглэгчээр ард түмнийг үргэлж байлгахыг дэмжиж байгаа явдал. Ц.Анандбазар, Б.Баттөмөр нарыг дэмжээд сууж байна. Ш.Адьшаа тэгэхэд шатахуунаа хийе, түүхий эдээ татваргүй оруулъя гээд адлагдаж явна.

Даажинтай шүү, нээрээ. Алтанширээгийн тэрхүү үйлдвэрийн төслийн дарга Д.Алтанцэцэг гэдэг эмэгтэй байх. Ажил нь явдаггүй, Амжилт нь харагддаггүй. Технологи нь зөрсөн дуулдах. Ажиллуулсан монгол компаниуддаа мөнгийг нь өгдөггүй.

Савируулаад л, даажигнадаг. Ингэж ажил явахгүй ээ. Алтанширээгийн газрын тосны үйлдвэр асар удалгүй нийгмийн асар том ноцтой сэдэв болно.

Хэвлэл мэдээллийнхэн анхаарлаа хандуулж мөшгөх нь зохино. Д.Алтанцэцэг гэдэг хүний ажлыг, хэрхэн яаж ажиллаж байгааг дурайтал гаргах хэрэгтэй. Ажилласан гурав дөрвөн жилд нь юу амжиж, юу хоцрогдов гэдэгт бодитой дүгнэлт хийх цаг хэдийнэ болсоон. Хоцрогдол тодорхой.

Жамбалын Ганбаатарын ашиглалтад оруулах товыг арагшлуулан, хүрдлэн хэлээд байгаа он онуудын ухралт. Шүүр ажиллагаа энэ мэтээр олон талт ажиллах хэрэгтэй.

Ингэж байж улс орон цэвэршинэ. Засгийн газар, Ерөнхий сайд Л.Оюун-Эрдэнэ энийг нэн сайн мэдээд байгаа нь ажиглагдаж байгаа, ажиглагдах юу байхав, гудамжинд хүн зон яриад, дэмжин оноох байдал дэлхэж байгаа нь хэнд ч анзаарагдахаар байна.

З.БАЯРАА

Амлалт.мн