Сүхбаатар аймаг хөшөө дурсгалын тоогоорооо улсдаа тэргүүлдэг гэхэд хилсдэхгүй. Гэтэл аймгийн удирдлагууд нь дахиад ч хөшөө барихаар санаархаж байна.
Тодруулбал, энэ жил аймгийнх нь 80 жилийн ой тохиох бөгөөд үүнийг тохиолдуулан аймгийн Улаанбаатар хот дахь нутгийн зөвлөл нь 12 метр өндөр Бурхан багшийн дүр барьж өгөхөөр амлажээ. Энэ нь хоёр тэрбум гаруй төгрөг болно гэх мэдээлэл байна.
Ингэхдээ Алунгоо эхийн хөшөөг буулгаад суурин дээр нь барих гэж байгаад нутгийн иргэдийн зарим нь дургүйлхэж байгаа сурагтай. Тодруулбал, аймгийн төв дэх Дөрвөлж толгой дээрх Алунгоо эхийн хөшөөг зөөж нүүлгэсэн байна. Энэ үйл явдалд тус хөшөөг бүтээсэн МУЭ-ийн гишүүн зураач Ё.Бадарч зохиогчийн эрхийн асуудалд халдлаа хэмээн эмзэглэж буй аж.
Хөшөөөнүүд хуулиараа түүх соёлын үл хөдлөх дурсгал гэдэг нэр томьёонд багтдаг. Эвдэрч, гэмтэх, авран хамгаалах шаардлагатай болсон тохиолдолд тухайн аймгийн ИТХ-ын шийдвэрээр авран хамгаалах арга хэмжээ зохион байгуулдаг байна. Мөн түүх Соёлын дурсгалыг зөөвөрлөх журам гэж байдаг аж. Гэтэл аймгийн Соёл, урлагийн газарт ямар ч албан бичиг ирээгүй, эрх зүйн акт гараагүй буй юм.
Харин эл хөшөө сүндэрлэх тухай Сүхбаатар аймгийн ИТХ-ын дарга Д.Хосбаяр "Сүхбаатар аймагт барьж байгаа шиг 12 метр буюу 4 давхар байшин шиг хөшөө өөр аймагт байхгүй. Би хэллээ. Бразилчууд хөшөөгөөрөө бахархдаг” хэмээжээ.
Сүхбаатар аймгийн Засаг дарга М.Идэрбат: “Энэ жил Улаанбаатар хот дахь Сүхбаатар аймгийн Нутгийн зөвлөлөөс аймагтаа бурхны хөшөөтэй, ойр орчмыг тохижуулсан цэцэрлэгт хүрээлэн барья. Хаана байгуулах вэ гэдэг санал тавьсан. Энэ асуудлыг бид ярилцаад, Дөрвөлж толгой дээр хийхээр болсон. Энэ бүтээн байгуулалт бол цэвэр хандиваар босно” хэмээсэн байна.
