Улсын Их хурлын 2022 оны намрын ээлжит чуулган 10-р сарын 3-нд нээлтээ хийсэн.
Чуулганы нээлтийн үеэр УИХ дахь Ардчилсан намын бүлгийн гишүүд эдийн засгийн хямрал, төгрөгийн ханшийн уналт, бараа бүтээгдэхүүний үнийн өсөлтийг бодитоор дэлгэн харуулсан юм.
Мөн УИХ-ын гишүүн Д.Ганбат өөрийн байр сууриа микрофонгүйгээр илэрхийлж, УИХ-ын дарга Г.Занданшатар руу парламентын гишүүний үнэмлэхээ шидсэн.
Дараа нь УИХ-ын гишүүн Д.Ганбат сэтгүүлчдэд мэдээлэл хийж “Их зохиолч Д.Нацагдоржийн “Цагаан сар ба хар нулимс” гээд зохиол байдаг. Ард түмний хувьд өдөр болгон хар нулимс, эрх баригчдын хувьд өдөр болгон цагаан сар шиг байна. Ийм л хүнд нөхцөл байдалтай байна. Улсын их хурал өргөсөн тангарагтаа үнэнч биш байна.
Өнгөрсөн хоёр жилд МАН-ынхан ЖАН-гийнхан нийлж Монгол улсын эдийн засгийг унагалаа. Ардчилсан намын бүлэг сөрөг хүчний үүргээ гүйцэтгэж чадахгүй байна. Тиймээс ард түмэнтэйгээ хамт даварсан эрх баригчдыг даруулгатай, замбараатай болгох тал дээр Ардчилсан нам болон миний бие ажиллана” гэсэн юм.
