Наймдугаар сарын 31-ний өдрийн Засгийн газрын ээлжит хуралдаанаас гаргасан шийдвэрийн талаар Цахим хөгжил, харилцаа холбооны сайд Н.Учрал мэдээлэл хийсэн юм.
Тэрбээр “Засгийн газрын хуралдаанаар Төрийн хэмнэлтийн хууль болон Төрийн хяналтын хууль, “Цахим монгол” хөтөлбөрийн хэрэгжилтийг эрчимжүүлэх үүргийг Ерөнхий сайд өглөө.
Төрийн хэмнэлтийн хуулийг хэрэгжүүлэх явцыг эрчимжүүлж, авлигын индексийг бууруулахад Цахим хөгжил, харилцаа холбооны яам гол үүрэгтэйг ч давхар онцолсон.
Нийтийн мэдээллийн тухай хуульд зарим мэдээллийг нээлттэй болгох талаар тусгасан.
Бусад салбаруудтай хамтарч мэдээллийг олон нийтэд ил тод болгох чиглэлээр ажиллана.
Хувь хүний мэдээлэл хамгаалах хуулийн дагуу 3.6 сая мэдэгдэл төрийн цахим шуудангаар дамжин иргэдэд хүрсэн байна.
Өнөөдрийн байдлаар улсын хэмжээнд 266 мянган иргэнд тоон гарын үсэг олгосон. Тоон гарын үсгийг хэрэглээнд нэвтрүүлэх ажлыг хурдасгах үүргийг Ерөнхий сайд өгсөн. Тоон гарын үсгийг банк, санхүүгийн салбарын үйлчилгээнд нэвтрүүлнэ.
Улсын хэмжээнд алслагдсан 5 сум, боомтод шилэн кабель тавих ажил энэ онд дуусна.
2022 оны 9-р сарын 5-6-нд Монгол Улсын Засгийн газар, Цахим хөгжил, харилцаа холбооны яам, НҮБ-тай хамтран олон улсын хурал зохион байгуулна.
Энэ үеэр НҮБ-аас Монгол Улсыг цахим шилжилтийн үлгэр загвар болсон орон гэдгийг албан ёсоор зарлана гэсэн сайн мэдээтэй байна” гэжээ.
