Тэрбээр “Төсвийн хуулийг баталж байгаатай холбогдуулан Засгийн газраас олон хуулиуд өргөн барьж байна. Түүний нэг нь Ашигт малтмалын тухай хуульд нэмэлт өөрчлөлт оруулах тухай хуулийн төсөл юм.

Энэ хуулийн төслөөр салбарын сайдаас нь ч зөвшөөрөл авалгүйгээр орон нутагт уул уурхайн олборлолт хийж байгаа компаниуд тухайн нутаг дэвсгэрт хандив, тусламж өгөхийг нь баталгаажуулсан.

Энэ нь нөгөө талаараа тэнд ажиллаж байгаа гадаад, дотоодын иргэд, ажилчдын квотын асуудлыг ч мөн хөндөхөд хүргэж байна.

Ховд аймгийн Мянгад суманд байдаг Халзанбүргэдэйн ховор элементийн ордын асуудал сүүлийн үед Монголчуудын анхааралын төвд орсон.

Монгол улсын үндсэн хууль гэж бид бүхний хамгийн ихээр дээдэлж, шүтдэг баримт, бичгнйн 6.2-т “Монгол улсын иргэн тухайн газар нутаг, газрын хэвлийн баялагийг ашиглахтай холбоотой, байгаль орчин, эрүүл мэндийн чиглэлийн асуудлыг мэдэх эрхтэй” гэж заасан.

Халзанбүргэдэйн ордын 6-7 лицензийн зарим нь асуудал дагуулсан.

Монголын цэвэр усны нөөцийн 70 хувь байдаг Хар ус нууруудын эко систем болон ард түмний эрүүл мэнд, байгаль орчинд ямар нөлөө үзүүлэх нь тодорхойгүй энэ нөхцөлд тухайн орон нутагт амьдарч байгаа иргэд, мэдэх эрхээ эдлэх ёстой.

Гэтэл уул уурхайн компаниуд орон нутгийн иргэдийг тагнах, чагнах түүнчлэн хууль хүчний байгууллагаар далайлгах, мэдэх эрхээ хэрэгжүүлсэн иргэдийг хавчин боох, тэнд ажилласан, санал бодлоо илэрхийлсэн хэвлэл, мэдээллийнхнийг цагдаа хүчний байгууллагад өгч шалгуулах, дарамтлах зэрэг үйл ажиллагаа явуулж байгаад туйлын харамсаж байна. “Монголын зэс корпораци” ийм маягийн үйл ажиллагаа явуулж байгаа.

Өнөөдөр бид Ардчилсан Монгол улсад байгаа. Ийм хууль бус үйл ажиллагаа явагдаж байхад орон нутгийн засаг захиргаа, ИТХ-ын төлөөлөгчдийн нүд нь балай, чих нь дүлий мэт байгаа. Өнөөдөр би ХЗДХ-ийн сайд болон Засгийн газарт анхааруулъя.

Мэдэх эрхийнхээ төлөө үгээ хэлсэн, үзэл бодлоо илэрхийлсэн, ард иргэдийг уул уурхайн компанийн мэдүүлэг, ятгалгаар мөрдөн шалгаж, хүч хэрэглэх, хууль бусаар торгох, баривчлах үйл ажиллагаа явуулах юм бол хатуу эсэргүүцэл үзүүлнэ гэдгээ хариуцлагатайгаар мэдэгдье

Бид өнөөдөр хариуцлагатай уул уурхай явуулах ёстой. Хүч хэргэлэсэн байдлаар үйл ажиллагаа явуулах нь андуурал шүү гэдгийг лиценз эзэмшигч компаниудад анхаарулъя.

Мөн орон нутгийн цагдаа, засаг захиргааны байгууллагаас иргэдийн мэдэх эрхээ хангах үйл ажилагааг нь боомилж, боогдуулвал ард түмний элчийн хувьд хэзээ ч өршөөхгүй гэдгээ хэлье.

Хариуцлагатай уул уурхайг дэмжинэ. Хүний эрүүл мэндэд хор нөлөөгүй, байгаль орчинд ээлтэй, уул уурхайг ашиглаж, Монгол улсынхаа эдийн засгийг хөгжүүлэх, гадаад дотоодын хөрөнгө оруулалтыг дэмжих асуудал бол зөв бодлого.

Хар ус нуурын экосистем бол ашигт малтмал, хөрөнгө мөнгөнөөс илүү чухал асуудал шүү.

Та бүхэн ч бас анхаарлаа ийш нь хандуулаарай” гэв.