УИХ дахь МАН-ын бүлгийн ээлжит хурал өнөөдөр боллоо. Хуралдаанаар Газрын тухай багц хуулийг хэлэлцсэн байна.
Хуралдаанаас гарсан шийдвэрийн талаар мэдээлэл хийв.
УИХ дахь МАН-ын бүлгийн дарга Д.Тогтохсүрэн “МАН-ын бүлгийн ээлжит хурлаар Газрын тухай багц хуулийн төслийг хэлэлцлээ. Хуулийн төслийг Засгийн газраас өнгөрсөн сард УИХ-д өргөн барьсан.
Газрын тухай ерөнхий хуулиас гадна Иргэнд газар өмчлүүлэх тухай, Газрын төлбөрийн тухай, Газрын кадастрын тухай, Нийгмийн зайлшгүй хэрэгцээг үндэслэх газар чөлөөлөх тухай зэрэг хуулийн төслүүдийг хамтатган хэлэлцэх юм.
Хуулийн төслүүдийг бүлгийн хуралдаанаар гишүүдийн олонх зарчмын хувьд хэлэлцэхийг дэмжлээ. Цаашид хуулийн төслийг хэлэлцэхдээ анхаарах хэд хэдэн зүйл бий гэж үзсэн.
Тухайлбал, хуулийн төслийг хэлэлцэхдээ Барилга, хот байгуулалтын тухай хуультай хамтран хэлэлцэх талаар санал нэгдлээ. Тиймээс эдгээр хуулийн төслийг хамтад нь хэлэлцэж, хууль хоорондыг уялдуулах ёстой. Мөн Газрын тухай хуулийг хэлэлцсэнээр газрын шинэтгэл явагдаж, газрыг эдийн засгийн эргэлтэд оруулах зэрэг ач холбогдолтой хэмээн үзлээ” гэв.
УИХ-ын гишүүн Б.Энхбаяр:Засгийн газраас Газрын багц хуулийн хүрээнд таван багц хуулийн төсөл өргөн барилаа. Нэмэгдээд Хот байгуулалтын тухай хуулийн төсөл болон Тусгай хамгаалалттай газрын тухай хуулийн төслийг хэлэлцэнэ.
МАН-ын бүлэг зарчмын хувьд хэлэлцэх хэсгийг дэмжих шийдвэр гаргалаа. Газар бол улсын үндэс. Тусгаар тогтнолтой холбоотой асуудал яригдана.
Газрыг хувьдаа өмчлөх асуудлыг шийдээд 20 жил болж байна. Гэвч хангалттай хэмжээгээр эдийн засгийн эргэлтэнд орж чадахгүй байна.
Өнгөрсөн 20 жилийн хугацаанд Монгол улс нийт газар нутгийнхаа 0.04 хувийг өмчлүүлсэн байна. Цаашдаа хувийн өмчийн эрхийг улам баталгаажуулах чиглэлд анхаарах шаардлагатай.
Газрын харилцааны хуульд хамрагдахгүй иргэн гэж байхгүй. Өнөөдрийн байдлаар Монгол улсын хэмжээнд нэг сая, нэг зуун мянган иргэн, хуулийн этгээд газар эзэмших болон, өмчлөх эрхийн харилцаанд орсон байна.
Бид хэдийгээр газрын хуультай боловч, нөгөө талаар хуульгүй мэт аяглах хандлага бий болсон. Үүний олон жишээг дурдаж болно.
Хамгийн үнэтэй баялгаа бид үнэ цэнэгүй байлгаж ирсэн. Газрын шимтгэлийн цаана далд байгаа эдийн засгийг ил болгох, улмаар татвар авах бодлогыг давхар шийднэ.
Барилга, хот байгуулалтын сайд Б.Мөнхбаатар “Газрын тухай хууль 2002 онд батлагдсанаас хойш нийт 33 удаа нэмэлт өөрчлөлт орсон байна. Газрын багц хуулийг зайлшгүй шинэчлэх шаардлага тулгарсан. Газар олгох үйл явц тус тусдаа явагддаг байдлыг цэгцэлнэ. Дүүргүүдийн газар олголтын асуудлыг нийслэлээс цахимаар шийддэг болно. Газрын маргааныг шийдэх зөвлөлийг бий болгоно” гэв.
