Үе үеийн парламент, засгийн газар “хувийн хэвшлийнхнийг дэмжинэ, төрөөс үзүүлэх хүнд суртал, дарамтыг бууруулна” гэдэг амлалтыг өгдөг. Гэвч энэ амлалт цаасан дээр мөр төдий үлдэж, бодит байдал дээр хэрэгжилгүй хойшилсоор өнөөдрийг хүрсэн гэхэд хилсдэхгүй.

Тэгвэл өнгөрсөн 7 хоногт Монгол Улсын Ерөнхий сайд Л.Оюун-Эрдэнэ Монгол Улсын ТОП-100 аж ахуйн нэгжүүдэд цом, өргөмжлөл гардуулах ёслолд оролцохдоо хэлсэн үг, мөн түүний хэрэгжүүлж эхлээд байгаа үйлдлүүд нь хувийн хэвшлийнхнийг төр засгийн зүгээс одоо л дэмжсэн шиг дэмжих нь үү дээ гэсэн итгэлийг төрүүллээ.

Тэрбээр хэлсэн үгэндээ “Шилдэг-100 аж ахуйн нэгжүүдийн шалгаруулалтад төрийн өмчит компаниудыг оролцуулж, хувийн хэвшилтэй өрсөлдүүлэхийг Ерөнхий сайдын хувьд татгалзсанаа дуулгаад, Төр өөрөө ресторан, зоогийн газар, амралт сувиллын газар ажиллуулж, хувцас оёж, машин засахаас эхлээд хувийн хэвшилтэй өрсөлддөг байдлыг үе шаттай өөрчилж байна. Төр, хувийн хэвшил хамтран богино хугацаанд шийдэл гаргаж чаддагийн энгийн нэг илэрхийлэл нь өнгөрсөн жилийн цэцэрлэгийн хүртээмжийг нэмэгдүүлсэн явдал байлаа. Цаашид уул уурхайн олборлолт, төрийн эзэмшлийн банкууд, онгоцны нислэгийн менежментийг дэлхийн түвшинд нийцүүлэн үндэсний болон олон улсын мэргэжлийн багаар удирдуулах ажлыг энд ондоо багтаан зохион байгуулах болно” гэлээ.

Ямартай ч Ерөнхий сайд Л.Оюун-Эрдэнэ төрийн компаниудын удирдлагууд нь төрийн нэрийн өмнөөс цалин авч ажил хийснийхээ төлөө шилдгээр шалгарч, өөрсдийгөө магтуулж, хувийн хэвшлийнхний дээр заларч, ажил албан тушаалаа их улс төрд орох шат гишгүүр болгож ашигладаг байдлыг таслан зогсоохоо мэдэгдэж, цаашид хувийн хэвшлийнхний хийж чаддаг ажлыг нь хийлгэнэ, хийлгээд ч эхэлсэн гэдгийг нийтэд зарлачихлаа.

Цаашдаа төрд бугшсан авлигыг бууруулах, төрийн зарим албан хаагчдын хүнд суртлыг багасгах, энэ чиглэлд шинээр батлагдах хуулиудын эрх зүйн орчныг сайжруулж батлуулах ажлуудыг Ерөнхий сайд шат дараатай хэрэгжүүлчихвэл энэ нь хувийн хэвшлийнхэнд төрөөс үзүүлж байгаа бодит дэмжлэг болох төдийгүй тэдний “эрүүл”-ээр өсөн дэвших бодит нөхцөл болох болно.

Ц.Мөнх

Amlalt.mn