Ул гэдэг үгээс болж улс төрд жаахан улдах маягтай болтлоо Даваажанцангийн Сарангэрэл гэдэг эмэгтэй омог төгөлдөр явлаа. Одоо ч улдаад, балбаад сүйд болсон юмгүй л дээ. Гурван удаа сайд хийв. Гурван удаа УИХ-д сонгогдов. Арван жилийн дотор ийм карьер хийх эмэгтэй ховор. Ингэж азтай, одтой, онгодтой эрх мэдэл, алба тушаал хаших ээжийн охин ч цөөн. Энэ үүднээсээ Д.Сарангэрэл гишүүн хүний атаа төрөхөөр л явж ирэв бололтой.
Харин сүүлийн үед наяад оны дарга нар нь юм уу, нам дахь зарим хэсэг бүлгүүд ч юм уу, мань гишүүнийг жаахан дарсан байдал харагдаад байх шиг. Нам дахь эмэгтэйчүүдийн байгууллагын дарга болголгүй Х.Булгантуяаг урдуур нь гишгүүлэв. Сүүлд хашсан Нийгмийн хамгааллын сайдаасаа сар болоод буусныг хэлэх үү, Д.Сарангэрэл гишүүн уцаар ундууцал, хор шарт буцалсхийгээд л явах шиг үзэгдэх.
Сая, Х.Булгантуяа сайд тэтгэвэр тэтгэмж, хүүхдийн мөнгө өгөх талаар мэдээлэл өгснийг, “балай яриад” гээгүй байгаа даа, тиймэрхүү өнгөөр шүүмжилсэн харагдсан. Нөгөөтээгүүр ул гэдэг үгийг Аюушийн Ариунзаяа тэргүүтэн хүүхнүүд “хэлүүлж”, иймэрхүү хандлага, тогтлоор ажил үйлээ томьёолж, нийгмийг эрэмбэлж явсныг хэлснээрээ адлагдсандаа гоморхлоо ер арагш тавихгүй яваад байх шиг.
А.Ариунзаяад хаягласан таагүй үг хандлага хэвлэлээр цөөнгүй тохиолдох. Монголын улс төр дэх цөөхөн хүүхнүүд иймэрхүү маягаар толхилцмооргүй л байгаа юм. Улс төр дэх шийдвэр гаргах түвшинд хүүхнүүд угаасаа цөөхөн, энэ хэрээр хүүхнүүдийн илүү чамбай, хийгүй, төгс төгөлдөр тийш тэмүүлсэн хандлага л нийгмийн тогтсон хэвшил, үзэл санааг өөрчлөх учиртай билээ.
Д.Сарангэрэл бол энэ талаар гарцаагүй манлайлал үзүүлж байх учиртай хүний нэг. Д.Сарангэрэл гишүүн сэтгүүлч хүн. Энэ үүднээсээ хэвлэл мэдээллийн орон зай, сэтгүүл зүйн салбарынхан энэ гишүүнд ер нь тун үргэлж ээллэг байдалтай байдгийг анзаарч болох. Өөрөө ч хүнтэй эвсээр нийцэмжтэй, үг хэл зохирсон, итгэл үнэмшил, үзэл бодлоо тодорхой илэрхийлчихдэг эмэгтэй.
Хан-Уул дүүргээс хоёронтоо сонгогдсон. Харин арван хоёр онд У.Хүрэлсүх эхнэрээ Австралид эмчлүүлнэ гэж яваад, Их хурлаас чөлөөлөгдөхөд жагсаалтаар дэвшсэн байсан эрэмбэ нь урагш татаж анх УИХ-д орж ирсэн хүн л дээ. У.Хүрэлсүх, Сү.Батболд нарын өнгө дээр улс төр, Ардын намд ихээхэн байр суурьтай, өдгөөгийн өндөрлөг хүрэх замаа зассан хатагтай.
Хүү нь нэг хэсэг Төрийн худалдан авах ажиллагааны газрын даргаар ажилласан. Өөрөө удаа дараа сайд хийгээд, хүү нь тийм эрх ашиг, нийгмийн ажиглал өндөр ажилд байхад ихээхэн шүүмжлэгдэж, улмаар ажлаа өгснөөр аяарч байх шиг.
Тэгээд ч Л.Оюун-Эрдэнэ, Д.Амарбаясгалан нар ч нэг айлаас нэг хүн төрийн дээд алба хашна гээд хуульчлах нь тод байна. Д.Сарангэрэл гишүүний хүү сайдад газар зараад, эдүгээ тэр газарт ихээ том байшин барилга сүндэрлэсэн гээд мэдээлэл яваад байх.
Мэдээлэлд ойр, эрх мэдэлд ойрын дөтийг нэг их чичрэн ашиглахгүй байх хүнээр л ойлгогддог, Д.Сарангэрэл гишүүн. Нэрээ, нүүрээрээ түрий барьж нэг их давшлахгүй байх. Улсын Их хуралд тодхон дуутай муугүй гишүүн байлаа, байна.
Ирэх сонгуульд энэ эмэгтэй дэвших сонирхолтой нь тааж ядах юмгүй. Гагцхүү наяад оны дарга нар нь, намын нь олон л түүнийг дэвшүүлэх эсэхийг шийдэх байх даа. Улсын Их хурлын гишүүн төрд зүтгэснийх нэг тодорхой өв үлдээж байх ёстой. Сайны.
Тэр нь Д.Сарангэрэлийн хувьд хэвлэл мэдээллийнхний эрх ашиг, нээлттэй байдал, эрх чөлөөний төлөө харин ч дуу тод, дугараа цартай байснаар үлдэнэ гэж мэдэгддэг. Нийгэм ч тэгж мэдэрдэг. Даваажанцагийн Сарангэрэл УИХ, Засгийн газрын гишүүнээр ажилласан он цагууддаа эмэгтэй хүн, тэргүүлэх эмэгтэйн үлгэр загварыг бас ч жишиг байхаар харагдуулсан уу гэвэл үгүй гэж хариулах боломжгүй.
Б.Баяр
Amlalt.mn
